O‘zbekiston mustaqilligining 30 yilligi munosabati bilan viloyatlarda ham bayram tantanalari bo‘lib o‘tdi. “Daryo” muxbirlari bayram tadbirlarining e’tiborga molik jihatlarini suratga oldi.
Qashqadaryo viloyati
“Daryo”ning Qashqadaryo viloyatidagi muxbiri Otabek Qo‘ldoshevning viloyat rahbari Zoir Mirzayev nutqidagi ma’lumotlarga tayanib xabar berishicha, Qashqadaryoda 2021-yilda sanoat hajmi 18,5 trillion so‘mga yetkazilib, o‘sish 115 foizni ko‘rsatgan.
Tadbirkorlik uchun joriy qilingan imtiyoz va prefensiyalar, pandemiya sharoitida amalga oshirilgan qo‘llab-quvvatlashlar natijasida o‘tgan davrda 7282 ta kichik biznes subyekti yangidan tashkil qilinib, yalpi ichki mahsulotda kichik biznesning ulushi 71 foizga yetkazilgan.
Qayd etilishicha, hozirda viloyatning 11 ta tumanida 4 ta to‘qimachilik, 12 ta tayyor trikotaj, 8 ta ip-kalava ishlab chiqarish korxonasi qurilmoqda. Buning natijasida 7150 ta yangi ish o‘rni yaratiladi va paxtani qayta ishlash darajasi amaldagi 53,2 foizdan, 94,3 foizga yetkaziladi.
“Bu yil viloyatimiz tarixida birinchi marta davlat budjetidan 2,4 trillion so‘m mablag‘ ajratilib, jami 2945 ta obyektda qurilish-ta’mirlash ishlari olib borilmoqda. Xususan, 520,1 milliard so‘m mablag‘ hisobiga jami 781 ta maktabda qurilish-ta’mirlash ishlari olib borilmoqda, shundan 98 ta maktab binosi yangidan qurilmoqda”, — dedi bayram tadbirida so‘z olgan Zoir Mirzayev.
Ta’kidlanishicha, aholini toza ichimlik suvi bilan ta’minlashga 432,4 milliard so‘m mablag‘ ajratilib, ichimlik suvi ta’minoti 37 foizdan 49 foizga yetkazilgan. Birgina, jami uzunligi 78,8 km bo‘lgan Oqsuv—Dehqonobod suv tarmog‘iga ajratilgan 281,5 milliard so‘m mablag‘ hisobiga 116 ta qishloqdagi 27 512 ta xonadon va 112,8 ming aholi toza ichimlik suvi bilan ta’minlangan.
Viloyatda “Obod qishloq” va “Obod mahalla” dasturiga kirgan 30 ta mahalla uchun ajratilgan 626,3 milliard so‘m hisobiga 26 225 xonadonga ichimlik suvi kirib borishi, 27 721 ta xonadonda elektr ta’minoti yaxshilanishi, 170 ta yangi tadbirkorlik subyekti tashkil qilinishi, 15 ta mahalla binosi barpo etilishi rejalashtirilgan.
Buxoro viloyati
“Daryo”ning Buxoro viloyatidagi muxbiri Laylo Hayitovaning ma’lumot berishicha, viloyatda yalpi hududiy mahsulot 132 foizga, sanoat ishlab chiqarish 118 foizga, mahalliy sanoat 162 foizga, qurilish ishlari 185 foizga va xizmatlar sohasi 196 foizga hamda asosiy kapitalga kiritilgan investitsiyalar 2,2 barobarga oshgan.
Viloyat hokimi Botir Zaripovning ma’lumot berishicha, o‘tgan besh yilda respublika budjetiga berilishi kerak bo‘lgan jami 1,4 trillion so‘m mablag‘ viloyat tasarrufida qoldirilgan bo‘lib, mazkur mablag‘lar aholi bandligini ta’minlash, obodonlashtirish, tuman-shaharlar infratuzilmasini rivojlantirish va ijtimoiy loyihalarga yo‘naltirilgan.
Qayd etilishicha, viloyatda ixtisoslashtirilgan maktablar soni 18 tadan 51 taga yetkazilgan va so‘nggi uch yilda 16 ta yangi ixtisoslashtirilgan maktab va maktab-internati, 1 ta oliy ta’lim muasasasi tashkil etilgan.
Andijon viloyati
“Daryo”ning Andijon viloyatidagi muxbiri Umidjon Mamarasulovning ma’lumot berishicha, viloyatning asosiy bayram tadbiri Andijon shahridagi yozgi amfiteatrida bo‘lib o‘tgan.
Hokim o‘z nutqida so‘ngi yillarda Andijon viloyatida amalga oshirilayotgan bunyodkorlik ishlari, xotin-qizlar, yoshlarning bandligini ta’minlash, tadbirkorlikni qo‘llab-quvvatlash borasida olib borilayotgan ishlar, erishilayotgan natijalar haqida gapirgan.
Izoh (0)