AQSh prezidenti Jo Bayden 24-avgust kuni G7 mamlakatlari yetakchilari bilan “Tolibon” nazoratiga o‘tgan Afg‘onistondagi vaziyat yuzasidan muzokaralar o‘tkazdi. Bu haqda anonim manbalarga asoslanib, The New York Times xabar berdi.
Bayden uchrashuvda AQShning Afg‘onistondagi missiyasini oldindan rejalashtirilgan muddat — 31 avgustga qadar yakunlashga intilayotganini aytdi. Biroq uning so‘zlariga ko‘ra, Amerika qo‘shinlari o‘sha kundan keyin ham mamlakatda qolishi ehtimoli bor.
Baydenning ta’kidlashicha, Amerika qo‘shinlarining Afg‘onistonda qolishi har kuni tahdidlarni oshirmoqda. Uning so‘zlariga ko‘ra, 31-avgustdan keyin terrorchilik hujumlarining xavfi “juda yuqori” bo‘ladi. Baydenning qo‘shimcha qilishicha, qo‘shinlarning Afg‘onistondan to‘liq olib chiqilishi barcha amerikaliklar va ularning afg‘onistonlik ittifoqchilarini mamlakatdan olib chiqishni yakunlash vaqtiga bog‘liq.
NYT ma’lumotlariga ko‘ra, amerikaliklar missiya tugashidan bir necha kun oldin aeroportdan evakuatsiya qilishni to‘xtatadi, shundan so‘ng qolgan qo‘shinlar, texnika va Amerika fuqarolarini olib chiqish ustuvor vazifa bo‘ladi. AQSh harbiy amaldorlaridan birining NYT’ga aytishicha, AQSh shu hafta yoki kelayotgan dam olish kunlari, 28–29- avgustda Kobul aeroportidan 6000 askarini olib chiqa boshlaydi.
Fox News xabar berishicha, qo‘shinlarni olib chiqish allaqachon boshlangan. Bu ma’lumotni The Washington Post ham tasdiqladi. Fox manbalarining aytishicha, harbiylarni olib ketish boshlanganiga qaramay, AQSh Kobul aeroportini “himoya qilishga qodir” va “evakuatsiya qilinadigan amerikaliklarni chiqarib yubora oladi”.
Avvalroq “Tolibon” rasmiylari AQShdan 31-avgustgacha qo‘shinlarini Afg‘onistondan olib chiqishni talab qilgan, aks holda buning “oqibatlari” bo‘ladi deb ogohlantirgandi.
Oq uyning rasman xabar qilishicha, Bayden G7 yetakchilariga AQShning Kobuldagi missiyasi “maqsadlarga erishilganda” tugashini aytgan. Prezident qo‘shinlarning Afg‘onistonni 31-avgustgacha tark etishiga umid qilmoqda. Bayden, shuningdek, G7 ga kundan kunga teraktlar xavfi oshib borayotganini aytdi.
So‘nggi kunlarda Kobul aeroportidagi evakuatsiya ishlarining tezligi oshdi. “Tolibon” Kobulni egallab olgan 15-avgustdan buyon 58 700 kishi aeroportdan evakuatsiya qilingan, shularning uchdan bir qismi — 21600 kishi birgina 23-avgustda olib chiqib ketilgan.
AQSh hukumati Afg‘onistonni tark etishning oxirgi imkoni bo‘lgan Kobul aeroportiga kirishni cheklashga qaror qildi. Aeroportga faqat AQSh va NATO mamlakatlari fuqarolari, shuningdek, grin-karta egalari kirishi mumkin. Nomzodlarni filtrlashda endi “Tolibon” yordam beradi.
Izoh (0)