Байден G7 ни Афғонистондан Америка қўшинларини олиб чиқиш кечиккан тақдирда терактлар хавфидан огоҳлантирди

АҚШ президенти Жо Байден 24 август куни G7 мамлакатлари етакчилари билан «Толибон» назоратига ўтган Афғонистондаги вазият юзасидан музокаралар ўтказди. Бу ҳақда аноним манбаларга асосланиб, The New York Times хабар берди.

Байден учрашувда АҚШнинг Афғонистондаги миссиясини олдиндан режалаштирилган муддат — 31 августга қадар якунлашга интилаётганини айтди. Бироқ унинг сўзларига кўра, Америка қўшинлари ўша кундан кейин ҳам мамлакатда қолиши эҳтимоли бор.

Байденнинг таъкидлашича, Америка қўшинларининг Афғонистонда қолиши ҳар куни таҳдидларни оширмоқда. Унинг сўзларига кўра, 31 августдан кейин террорчилик ҳужумларининг хавфи «жуда юқори» бўлади. Байденнинг қўшимча қилишича, қўшинларнинг Афғонистондан тўлиқ олиб чиқилиши барча америкаликлар ва уларнинг афғонистонлик иттифоқчиларини мамлакатдан олиб чиқишни якунлаш вақтига боғлиқ.

NYT маълумотларига кўра, америкаликлар миссия тугашидан бир неча кун олдин аэропортдан эвакуация қилишни тўхтатади, шундан сўнг қолган қўшинлар, техника ва Америка фуқароларини олиб чиқиш устувор вазифа бўлади. АҚШ ҳарбий амалдорларидан бирининг NYT’га айтишича, АҚШ шу ҳафта ёки келаётган дам олиш кунлари, 28–29- августда Кобул аэропортидан 6000 аскарини олиб чиқа бошлайди.

Fox News хабар беришича, қўшинларни олиб чиқиш аллақачон бошланган. Бу маълумотни The Washington Post ҳам тасдиқлади. Fox манбаларининг айтишича, ҳарбийларни олиб кетиш бошланганига қарамай, АҚШ Кобул аэропортини «ҳимоя қилишга қодир» ва «эвакуация қилинадиган америкаликларни чиқариб юбора олади».

Аввалроқ «Толибон» расмийлари АҚШдан 31 августгача қўшинларини Афғонистондан олиб чиқишни талаб қилган, акс ҳолда бунинг «оқибатлари» бўлади деб огоҳлантирганди.

Оқ уйнинг расман хабар қилишича, Байден G7 етакчиларига АҚШнинг Кобулдаги миссияси «мақсадларга эришилганда» тугашини айтган. Президент қўшинларнинг Афғонистонни 31 августгача тарк этишига умид қилмоқда. Байден, шунингдек, G7 га кундан кунга терактлар хавфи ошиб бораётганини айтди.

Сўнгги кунларда Кобул аэропортидаги эвакуация ишларининг тезлиги ошди. «Толибон» Кобулни эгаллаб олган 15 августдан буён 58 700 киши аэропортдан эвакуация қилинган, шуларнинг учдан бир қисми — 21600 киши биргина 23 августда олиб чиқиб кетилган.

АҚШ ҳукумати Афғонистонни тарк этишнинг охирги имкони бўлган Кобул аэропортига киришни чеклашга қарор қилди. Аэропортга фақат АҚШ ва НАТО мамлакатлари фуқаролари, шунингдек, грин-карта эгалари кириши мумкин. Номзодларни фильтрлашда энди «Толибон» ёрдам беради.