“Tolibon” bir nechta vazirlik va idoralarga vaqtinchalik rahbarlar tayinladi

“Tolibon” bir qator vazirlik va idoralarga vaqtinchalik rahbarlar tayinladi. Jumladan, Sadr Ibrohim ichki ishlar vaziri vazifasini bajaruvchi, Gul Og‘a moliya vaziri vazifasini bajaruvchi etib tayinlandi, Najibullohga esa razvedka xizmati rahbarining vazifalari yuklandi. “Tolibon”, shuningdek, o‘z vakillarini ta’lim, oliy ta’lim vazirlari va Kobul gubernatori lavozimlariga tayinladi, deb yozadi “TASS” afg‘on agentligiga tayanib.

Bundan tashqari, “Tolibon” Hoji Muhammad Idrisni mamlakat Markaziy banki rahbari vazifasini bajaruvchi etib tayinladi. Qayd etilishicha, Idrisning Afg‘oniston “iqtisodiyotini tartibga solishi kutilmoqda”.

“Hoji Muhammad Idris Afg‘oniston Markaziy bankining yangi rahbari vazifasini bajaruvchi etib tayinlandi. Endi uning asosiy vazifalari davlat moliya va bank muassasalari faoliyatini tashkil etish, shuningdek, mamlakat aholisining muammolarini hal qilishdan iborat bo‘ladi ”, — deb yozadi “Tolibon” rasmiy vakili Zabihulla Mujohid.

Afg‘oniston Markaziy bankining sobiq rahbari Ajmal Ahmadiy ilgari aytganidek, “Tolibon” davlat zaxiralarining 0,1 foizidan ko‘prog‘iga egalik qilolmaydi, chunki ularning katta qismi AQSh tomonidan muzlatilgan. Ahmadiyning fikricha, hozirgi vaziyatda “Tolibon” inflyatsiya oshmasligi va aholi qashshoqlashmasligi uchun kapital oqimini nazorat qilishi, shuningdek, mamlakatdagi dollar aktivlaridan foydalanishni cheklashi kerak.

Avvalroq “Tolibon” rahbarlari Afg‘onistonni boshqarish uchun 12 kishidan iborat kengash tuzmoqchi ekani xabar qilingandi.

“Tolibon” Afg‘onistonda prezident yoki boshqa yagona rahbar lavozimini qayta tiklashni istamaydi, lekin shu bilan birga, ular avvalgi hukumat a’zolariga yangi kengashdan o‘rin taklif qilishni rejalashtirmoqda. Shu tarzda “Tolibon” xalqaro hamjamiyat e’tirofiga sazovor bo‘lish imkoniyatini oshirish uchun iloji boricha inklyuziv ko‘rinadigan boshqaruv organini yaratmoqchi, deb yozadi Foreign Policy.

Nashr manbasiga ko‘ra, “Tolibon”, shuningdek, Panjsher arsloni laqabini olgan dala qo‘mondoni Ahmadshoh Mas’udning o‘g‘li Ahmad Mas’udni ham hukmron kengashda ko‘rishni istagan bo‘lardi. Ammo kichik Mas’udning kengashga kirishi dargumon, chunki u Afg‘onistonning “Tolibon” nazoratiga o‘tmagan so‘nggi viloyati — Panjsherda jangarilarga qarshi kuchlarni boshqarmoqda.