Uch xonali hashamatli kvartira, 50 ming AQSh dollari, Lexus 570 Sport Plus 2021 yo‘ltanlamas avtomobili — ushbu sovg‘alar mustaqil Turkmaniston tarixidagi birinchi Olimpiada medali sovrindori Polina Guryevaga mamlakat prezidenti Gurbanguli Berdimuhamedov nomidan topshirildi.
Turkmaniston davlat jismoniy tarbiya va sport institutining 21 yoshli talabasi 14 mamlakat vakillari ishtirok etgan 59 kilogramm vazn toifasida og‘ir atletika musobaqalarida kumush medalni qo‘lga kiritdi.
Sovg‘alarni topshirish bo‘yicha tadbirning tantanali qismini ochar ekan, Turkmaniston bosh vaziri o‘rinbosari, mamlakatda xizmat ko‘rsatgan murabbiy Serdar Berdimuhamedov prezident tabrigini o‘qib eshittirdi. Unda Berdimuhamedov terma jamoa a’zolarini Turkmaniston sporti tarixida Tokio–2020 yozgi Olimpiya o‘yinlarida qo‘lga kiritilgan birinchi medal bilan tabrikladi.
“Mashaqqatli va muntazam mashg‘ulotlarning ajoyib natijasi, kuchli iroda va vatanga bo‘lgan buyuk muhabbat timsoliga aylangan ushbu muhim voqea baxtiyor sportchilar, ilhomlangan yoshlar va butun xalq orasida cheksiz g‘urur tuyg‘usini uyg‘otdi”, — deyiladi davlat rahbarining tabrigida.
Shu bilan birga, Turkmaniston prezidenti o‘z nutqida Guryevaning Olimpiya o‘yinlarida erishgan muvaffaqiyati “mustaqil yurtning dunyo bo‘ylab shuhratini, nufuzi va obro‘sini oshirganini” hamda mamlakat mustaqilligining 30 yilligi uchun eng yaxshi sovg‘a” bo‘lganini alohida ta’kidladi. Davlat rahbarining so‘zlariga ko‘ra, bu “mamlakatda yosh olimpiyachilarni tayyorlash uchun keng imkoniyatlar yaratishga qaratilgan davlat siyosatining natijasidir”.
So‘ng Turkmaniston prezidentining farmonlari va buyruqlari o‘qib eshittirildi, unga muvofiq Polina Guryevaning birinchi murabbiyi Ahmed Sariyev “Mustaqil Turkmanistonga bo‘lgan buyuk muhabbati uchun” ordeni bilan taqdirlandi. Og‘ir atletika bo‘yicha Turkmaniston terma jamoasi bosh murabbiyi Artur Emiryanga 2021-yilda chiqarilgan Toyota Camry premium klass avtomobili, Polina Guryevaga esa sport sohasida eng oliy bo‘lgan “Xizmat ko‘rsatgan sport ustasi” unvoni berildi.
“Turkmaniston mustaqilligining 30 yilligi munosabati bilan men medalimni turkman xalqiga va hurmatli prezidentga bag‘ishladim”, — dedi 2020-yilgi Olimpiya o‘yinlari vitse-chempioni. U davlat rahbariga Turkmaniston sporti rivojiga ko‘rsatilayotgan katta e’tibor uchun minnatdorlik bildirdi.
Polina Guryeva jurnalistlarga bergan qisqa intervyusida mashg‘ulotlarni davom ettirishini va uch yildan so‘ng Parijda bo‘ladigan navbatdagi Olimpiadada Turkmaniston uchun oltin medalni qo‘lga kiritishga harakat qilishini aytdi.
Eslatib o‘tamiz, Tokio shahrida bo‘lib o‘tgan XXXII yozgi Olimpiya o‘yinlarida O‘zbekiston terma jamoasi umumiy hisobda 5 ta medal qo‘lga kiritdi va umumjamoa hisobida 32-o‘rinni egalladi. Tokio Olimpiya o‘yinlari oltin medal egalariga Chevrolet Tahoe avtomobili va 4 sotixli hovli kalitlari topshirildi, bronza medaliga ega chiqqanlar Chevrolet Trailblazer va 2 xonali uy bilan taqdirlandi. Shuningdek, Tokio—2020 da qatnashgan har bir sportchi 5 ming dollar miqdoridagi mukofot puliga ega bo‘lishi belgilandi.
Izoh (0)