“Tolibon” Afg‘onistonni boshqarish uchun 12 kishilik kengash tuzadi

“Tolibon” rahbarlari Afg‘onistonni boshqarish uchun 12 kishidan iborat kengash tuzmoqchi. Bu haqda manbalariga tayanib, Foreign Policy xabar berdi.

Nashr ma’lumotlariga ko‘ra, kengash tarkibida quyidagi eng nufuzli uch kishi ham bo‘ladi:

• Mulla Abdug‘ani Birodar — “Tolibon”ning Dohadagi siyosiy idorasi rahbari;
• “Tolibon” harbiy komissiyasi rahbari mulla Moulaviy Yoqub — harakat asoschisi mulla Umarning o‘g‘li;
• Halil al-Rahmon Haqqoniy — “Haqqoniy tarmog‘i” guruhining yuqori martabali a’zosi.

“Tolibon” Afg‘onistonda prezident yoki boshqa yagona rahbar lavozimini qayta tiklashni istamaydi, lekin shu bilan birga, ular avvalgi hukumat a’zolariga yangi kengashdan o‘rin taklif qilishni rejalashtirmoqda. Shu tarzda “Tolibon” xalqaro hamjamiyat e’tirofiga sazovor bo‘lish imkoniyatini oshirish uchun iloji boricha inklyuziv ko‘rinadigan boshqaruv organini yaratmoqchi, deb yozadi Foreign Policy.Nashr manbasiga ko‘ra, “Tolibon”, shuningdek, Panjsher arsloni laqabini olgan dala qo‘mondoni Ahmadshoh Mas’udning o‘g‘li Ahmad Mas’udni ham hukmron kengashda ko‘rishni istagan bo‘lardi. 1990-yillarda Shoh Mas’ud “Tolibon”ga qarshi kurashayotgan guruhlar ittifoqi — Shimoliy Alyansni boshqargan, 2001-yilda u suiqasdda o‘ldirilgan.

Ammo kichik Mas’udning kengashga kirishi dargumon, chunki u Afg‘onistonning “Tolibon” nazoratiga o‘tmagan so‘nggi viloyati — Panjsherda jangarilarga qarshi kuchlarni boshqarmoqda.

“Tolibon” Panjsherdagi qarshilik kuchlarini qurshab olishni boshlagan. 22-avgust kuni “Tolibon” o‘zini qarshilik kuchlari yetakchisi deb e’lon qilgan Ahmad Mas’udga ultimatum qo‘ygandi.  “Tolibon” bayonotiga ko‘ra, Mas’udning tarafdorlari to‘rt soat ichida qurollarini tashlamasa, ular “jazolanadi”. Murojaatga “Tolibon”ning Panjsherga qarab ketayotgani aks etgan videotasvirlar ilova qilingan.

Mas’ud Asharq al-Awsat’ga bergan intervyusida muzokaralar yo‘li orqali “Tolibon” bilan qo‘shma hukumat tuzishga tayyorligini ma’lum qildi. Uning so‘zlariga ko‘ra, mamlakatda ekstremistik hukumat tuzish qabul qilinmaydi, chunki bu Afg‘onistonning o‘zi uchun ham, mintaqa uchun ham tahdidga aylanadi. “Agar ular qurol bilan Panjsherga kirsa, biz so‘nggi odamimizgacha himoya qilishga tayyormiz, ammo tinchlik yaratishga imkon berish kerak, garchi bu tinchlik ‘Tolibon’ bilan bo‘lsa ham” — dedi Mas’ud.

Ultimatumdan ko‘p o‘tmay “Tolibon” Panjsher viloyatiga “yuzlab jangchilarini” yuborganini ma’lum qildi.