O‘zbekistonda 2020-yil yakuniga qadar litsenziya yoki ruxsatnomalar soni yana kamida 30 foizga qisqartiriladi. Bu haqda Prezident Shavkat Mirziyoyev ma’lum qildi, deya xabar bermoqda “Daryo” muxbiri.
Prezidentning ta’kidlashicha, bugungi kunda tadbirkorlar uchun nazarda tutilgan subsidiyalar olish jarayoni o‘ta murakkabligicha qolmoqda. Shu sababli tadbirkorlik faoliyatiga aralashuvlarni qisqartirish, sohadagi tartib-taomillarni soddalashtirish, xususiy mulk daxlsizligi borasidagi siyosat qat’iy davom ettiriladi.
“Tadbirkorlarni davlat tomonidan qo‘llab-quvvatlash maqsadida 80 dan ortiq subsidiyalar joriy etildi. O‘tgan davrda ularga 2,3 trillion so‘m ajratildi. Lekin maktabgacha ta’lim, xalq ta’limi, muqobil energetika, baliqchilik, parrandachilik, qorako‘lchilik kabi 10 dan ziyod sohalarda subsidiyalar ishlamayapti. Mazkur masala Farg‘onadagi ‘Yulduzchalar ziyosi’ xususiy bog‘chasi rahbari Ziyoda Qosimova tomonidan ham ko‘tarilgan.
Bunga sabab – ushbu subsidiyalarni to‘lash tartibi murakkab va raqamlashmagan. Tadbirkor subsidiyani olish uchun o‘rtacha 5 ta hujjatni taqdim etishi, 10 ta vazirlik va idoradan xulosa olishi zarur. Bunga kamida bir oy ketadi”, — dedi Mirziyoyev.
Ta’kidlanishicha, 60 foiz chorvadorlar subsidiya olish jarayonini murakkab deb hisoblaydi.
“Shu bois 2022-yil 1-yanvardan subsidiyalarni ajratish bo‘yicha murojaatlar ‘yagona darcha’ tamoyili asosida qabul qilinadi, jarayonda ishtirok etadigan davlat idoralari soni 2-3 baravarga qisqartiriladi.
Kelgusi yildan boshlab tadbirkorlik faoliyatini boshlash uchun barcha ruxsat etuvchi hujjatlar onlayn tarzda rasmiylashtiriladi. 2021-yil yakuniga qadar litsenziya yoki ruxsatnomalar soni yana kamida 30 foizga qisqartiriladi”, — dedi Prezident.
Eslatib o‘tamiz, ayni paytda Toshkent shahridagi O‘zbekiston xalqaro anjumanlar saroyida Shavkat Mirziyoyevning tadbirkorlar bilan ochiq muloqoti bo‘lib o‘tmoqda. Ushbu tadbirda davlat rahbari tadbirkorlarga o‘z korxonalari ularga mulk qilib rasmiylashtirib berilishini, mamlakatdagi 13 mingta umumiy ovqatlanish obyekti 2021-yil yakuniga qadar yer va mulk solig‘idan ozod qilinishini, tashabbus ko‘rsata olmaydigan, yangi-yangi g‘oyalarni ko‘tarib chiqishga, o‘zgarish qilishga intilishi bo‘lmagan rahbarlarga nisbatan juda qattiq talab va choralar bo‘lishini aytdi.
Shuningdek, soliq idoralari qo‘llayotgan ayrim jarimalar sonidan xavotirda ekanligi, inflyatsiya darajasini kelgusi ikki yilda 5 foizga tushirish reja qilingani, O‘zbekistonda tadbirkorlarga kreditni milliy valyuta — so‘mda berish tizimi yo‘lga qo‘yilishini ma’lum qildi.
Izoh (0)