Ўзбекистонда 2020 йил якунига қадар лицензия ёки рухсатномалар сони яна камида 30 фоизга қисқартирилади. Бу ҳақда Президент Шавкат Мирзиёев маълум қилди, дея хабар бермоқда «Дарё» мухбири.
Президентнинг таъкидлашича, бугунги кунда тадбиркорлар учун назарда тутилган субсидиялар олиш жараёни ўта мураккаблигича қолмоқда. Шу сабабли тадбиркорлик фаолиятига аралашувларни қисқартириш, соҳадаги тартиб-таомилларни соддалаштириш, хусусий мулк дахлсизлиги борасидаги сиёсат қатъий давом эттирилади.
«Тадбиркорларни давлат томонидан қўллаб-қувватлаш мақсадида 80 дан ортиқ субсидиялар жорий этилди. Ўтган даврда уларга 2,3 триллион сўм ажратилди. Лекин мактабгача таълим, халқ таълими, муқобил энергетика, балиқчилик, паррандачилик, қоракўлчилик каби 10 дан зиёд соҳаларда субсидиялар ишламаяпти. Мазкур масала Фарғонадаги ‘Юлдузчалар зиёси’ хусусий боғчаси раҳбари Зиёда Қосимова томонидан ҳам кўтарилган.
Бунга сабаб – ушбу субсидияларни тўлаш тартиби мураккаб ва рақамлашмаган. Тадбиркор субсидияни олиш учун ўртача 5 та ҳужжатни тақдим этиши, 10 та вазирлик ва идорадан хулоса олиши зарур. Бунга камида бир ой кетади», — деди Мирзиёев.
Таъкидланишича, 60 фоиз чорвадорлар субсидия олиш жараёнини мураккаб деб ҳисоблайди.
«Шу боис 2022 йил 1 январдан субсидияларни ажратиш бўйича мурожаатлар ‘ягона дарча’ тамойили асосида қабул қилинади, жараёнда иштирок этадиган давлат идоралари сони 2-3 бараварга қисқартирилади.
Келгуси йилдан бошлаб тадбиркорлик фаолиятини бошлаш учун барча рухсат этувчи ҳужжатлар онлайн тарзда расмийлаштирилади. 2021 йил якунига қадар лицензия ёки рухсатномалар сони яна камида 30 фоизга қисқартирилади», — деди Президент.
Эслатиб ўтамиз, айни пайтда Тошкент шаҳридаги Ўзбекистон халқаро анжуманлар саройида Шавкат Мирзиёевнинг тадбиркорлар билан очиқ мулоқоти бўлиб ўтмоқда. Ушбу тадбирда давлат раҳбари тадбиркорларга ўз корхоналари уларга мулк қилиб расмийлаштириб берилишини, мамлакатдаги 13 мингта умумий овқатланиш объекти 2021 йил якунига қадар ер ва мулк солиғидан озод қилинишини, ташаббус кўрсата олмайдиган, янги-янги ғояларни кўтариб чиқишга, ўзгариш қилишга интилиши бўлмаган раҳбарларга нисбатан жуда қаттиқ талаб ва чоралар бўлишини айтди.
Шунингдек, солиқ идоралари қўллаётган айрим жарималар сонидан хавотирда эканлиги, инфляция даражасини келгуси икки йилда 5 фоизга тушириш режа қилингани, Ўзбекистонда тадбиркорларга кредитни миллий валюта — сўмда бериш тизими йўлга қўйилишини маълум қилди.
Изоҳ (0)