Qo‘qon shahar hokimining birinchi o‘rinbosari A.N. Qo‘qon mintaqaviy temiryo‘l uzeli moliya bo‘limi boshlig‘i o‘rinbosari O.M. bilan birga ushlangani haqida xabar berilgan edi. Buning sababi sifatida esa “Qo‘qon mintaqaviy temiryo‘l uzeli” balansida bo‘lgan 2,5 gektar yer maydonidagi bino va inshootlar bo‘yicha o‘tkaziladigan auksion savdolarida qaror chiqartirib berish evaziga 180 ming dollar talab qilingani ko‘rsatilgan. “Qo‘qon mintaqaviy temiryo‘l uzeli” rahbariyati mazkur holatga korxonaning mutlaqo aloqasi yo‘qligini ma’lum qildi.
“Korxonada hech qanday sotuvga qo‘yilgan yer maydoni ham mavjud emas”, — deb ta’kidlangan “O‘zbekiston temir yo‘llari” keltirgan raddiyada. DXX matbuot xizmati tomonidan tasdiqlangan xabarlarda ham “Qo‘qon mintaqaviy temiryo‘l uzeli” balansidagi yer maydoni haqida ma’lumot keltirilmagani qo‘shimcha qilingan.
Shuningdek, “Qo‘qon mintaqaviy temiryo‘l uzeli” moliya bo‘limi boshlig‘i o‘rinbosari sifatida ko‘rsatilgan shaxs ushbu korxona moliya bo‘limi boshlig‘i o‘rinbosari lavozimida ishlagan sobiq xodim ekanligi, u 2008-yildan 2017-yilgacha faoliyat yuritgani, undan so‘ng esa 2017-yildan 2021-yil davr mobaynida Qo‘qon shahar hokimining birinchi o‘rinbosari lavozimida ishlab kelganini ma’lum qilgan.
Izoh (0)