Temiryo‘l sohasida kelgusi 5 yil uchun 7 mingdan ziyod yuk vagonlariga ehtiyoj mavjud. Bu haqda Prezident Shavkat Mirziyoyev so‘z yuritdi, deya xabar bermoqda “Daryo” muxbiri.
Davlat rahbarining aytishicha, “Polvontosh” (Surxondaryo), “Afrosiyob parranda” (Samarqand) korxonalari rahbarlari ichki va tashqi temiryo‘l tariflari o‘rtasida katta farq borligi, ya’ni xalqaro tashuvlar narxi ancha yuqoriligini bildirgan. Shu bois Transport vazirligi, Moliya vazirligi va Monopoliya qo‘mitasi bilan birga, ikki oy muddatda temiryo‘l tariflarini qayta ko‘rib chiqsin. Bunda, tadbirkorlarga o‘zimizda ishlab chiqarilmaydigan xomashyo importi uchun amaldagi tariflar kamida 25 foiz arzon bo‘lishi kerak.
“Temiryo‘l sohasida kelgusi 5 yil uchun 7 mingdan ziyod yuk vagonlariga ehtiyoj mavjud. Bu muammoni davlat tomonidan emas, balki xuddi elektr energiyasi yoki sement ishlab chiqarishga o‘xshab, faqat va faqat xususiy sektorni jalb qilish orqali ijobiy hal qilish mumkin. Shuning uchun kelgusi yilda o‘z vagoni va konteyneriga ega bo‘lgan xususiy logistika operatorlari faoliyati yo‘lga qo‘yiladi va tariflar ikkiga ajratiladi.
Bunda, davlat tomonidan faqatgina temiryo‘l infratuzilmasi hamda lokomotiv xizmatlari tartibga solinadi, yuk vagonlari xizmati esa bozor tamoyillari asosida tashkil qilinadi.
Xususiy tadbirkorlarga temiryo‘l vagonlarini olib kelishga berilgan imtiyozlar 2025-yil 1-yanvargacha uzaytiriladi.
Albatta, bu taklifga ham qarshilar bor, faqat ‘yo‘q’ deyishni bilishadi. Lekin xususiy sektorga imkon bermasak, ‘O‘zbekiston temir yo‘llari’ AJning monopoliyasiga chek qo‘ya olmaymiz. Axir butun dunyoda shu tizim ishlaydi-ku, nega bizda ishlab keta olmaydi? Kimgadir yoqadimi, yoqmaydimi, endi biz xususiy sektorga ham imkon beramiz”, — dedi Prezident.
Eslatib o‘tamiz, ayni paytda Toshkent shahridagi O‘zbekiston xalqaro anjumanlar saroyida Shavkat Mirziyoyevning tadbirkorlar bilan ochiq muloqoti bo‘lib o‘tmoqda. Ushbu tadbirda davlat rahbari elektr energiyasidagi uzilishlar ko‘pchilik tadbirkorlarimizni bezovta qilayotgani ayni haqiqat ekanligini ta’kidladi.
Shuningdek, soliq idoralari qo‘llayotgan ayrim jarimalar sonidan xavotirda ekanligi, inflyatsiya darajasini kelgusi ikki yilda 5 foizga tushirish reja qilingani, O‘zbekistonda tadbirkorlarga kreditni milliy valyuta — so‘mda berish tizimi yo‘lga qo‘yilishini ma’lum qildi.
Tadbirkorlarga o‘z korxonalari ularga mulk qilib rasmiylashtirib berilishini, mamlakatdagi 13 mingta umumiy ovqatlanish obyekti 2021-yil yakuniga qadar yer va mulk solig‘idan ozod qilinishini, tashabbus ko‘rsata olmaydigan, yangi-yangi g‘oyalarni ko‘tarib chiqishga, o‘zgarish qilishga intilishi bo‘lmagan rahbarlarga nisbatan juda qattiq talab va choralar bo‘lishini ham aytdi.
Izoh (0)