Moskvadagi ommaviy mushtlashuvda qatnashgan muhojirlarning 46 nafari Rossiyadan deportatsiya qilindi

Rossiya hukumati Moskvadagi “Kuzminki” metro bekati yaqinida ommaviy mushtlashuv sodir etgan muhojirlarning 46 nafarini mamlakatdan deportatsiya qildi. Bu haqda Ichki ishlar vazirligi Moskva davlat boshqarmasi axborot va jamoatchilik bilan aloqalar bo‘limi boshlig‘i, polkovnik Vladimir Vasenin ma’lum qildi.

“Kuzminki’ metro bekati yaqinidagi mojaroda ishtirok etgan chet el fuqarolarini Rossiya Federatsiyasidan deportatsiya qilish ishlari davom etmoqda. Bugungi kun holatiga ko‘ra, 46 nafar chet el fuqarosi deportatsiya qilingan”, — dedi polkovnik.

Poytaxt politsiya bosh boshqarmasi matbuot xizmati xabariga ko‘ra, avvalroq 87 nafar xorijlik 15 kunga hibsga olingan. Bundan tashqari, ularning Rossiyada bo‘lish muddati qisqartirilgan va keyinchalik mamlakatga yana kirishi taqiqlangan. Ta’kidlanishicha, 87 muhojirning hammasi sud qarori bilan 90 kunga chet el fuqarolarini vaqtincha saqlash markaziga joylashtirilgan.

Mushtlashuvning sakkiz ishtirokchisiga nisbatan Jinoyat kodeksining 213-moddasi (bezorilik) bo‘yicha jinoiy ish qo‘zg‘atilgan.

So‘nggi yillarda chet elliklar orasida bo‘lib o‘tgan eng yirik ommaviy janjallardan biri 2021-yilning 12-iyulidan 13-iyuliga o‘tar kechasi Moskva shahridagi “Kuzminki” metro bekati yonida yuz bergandi. Unda 200 nafarga yaqin fuqarolar qatnashgan. Vakolatli organlar tomonidan mojaroning 103 nafar ishtirokchisini deportatsiya qilish to‘g‘risida qaror qabul qilingan.

Dastlab mojaro O‘zbekiston va Qirg‘iziston fuqarolari o‘rtasida chiqqani aytilgan. O‘zbekiston Tashqi migratsiya agentligi Rossiya Ichki ishlar vazirligi xodimlari bilan muloqotda bo‘lib, vaziyatni o‘rgandi va mojaroda o‘zbekistonliklar ishtirok etmaganini ma’lum qildi. Mushtlashuv Tojikiston va Qirg‘iziston fuqarolari o‘rtasida yuz bergan.