Россия ҳукумати Москвадаги «Кузминки» метро бекати яқинида оммавий муштлашув содир этган муҳожирларнинг 46 нафарини мамлакатдан депортация қилди. Бу ҳақда Ички ишлар вазирлиги Москва давлат бошқармаси ахборот ва жамоатчилик билан алоқалар бўлими бошлиғи, полковник Владимир Васенин маълум қилди.
«Кузминки’ метро бекати яқинидаги можарода иштирок этган чет эл фуқароларини Россия Федерациясидан депортация қилиш ишлари давом этмоқда. Бугунги кун ҳолатига кўра, 46 нафар чет эл фуқароси депортация қилинган», — деди полковник.
Пойтахт полиция бош бошқармаси матбуот хизмати хабарига кўра, аввалроқ 87 нафар хорижлик 15 кунга ҳибсга олинган. Бундан ташқари, уларнинг Россияда бўлиш муддати қисқартирилган ва кейинчалик мамлакатга яна кириши тақиқланган. Таъкидланишича, 87 муҳожирнинг ҳаммаси суд қарори билан 90 кунга чет эл фуқароларини вақтинча сақлаш марказига жойлаштирилган.
Муштлашувнинг саккиз иштирокчисига нисбатан Жиноят кодексининг 213-моддаси (безорилик) бўйича жиноий иш қўзғатилган.
Сўнгги йилларда чет элликлар орасида бўлиб ўтган энг йирик оммавий жанжаллардан бири 2021 йилнинг 12 июлидан 13 июлига ўтар кечаси Москва шаҳридаги «Кузминки» метро бекати ёнида юз берганди. Унда 200 нафарга яқин фуқаролар қатнашган. Ваколатли органлар томонидан можаронинг 103 нафар иштирокчисини депортация қилиш тўғрисида қарор қабул қилинган.
Дастлаб можаро Ўзбекистон ва Қирғизистон фуқаролари ўртасида чиққани айтилган. Ўзбекистон Ташқи миграция агентлиги Россия Ички ишлар вазирлиги ходимлари билан мулоқотда бўлиб, вазиятни ўрганди ва можарода ўзбекистонликлар иштирок этмаганини маълум қилди. Муштлашув Тожикистон ва Қирғизистон фуқаролари ўртасида юз берган.
Ундан аввал Москвадаги кафеда Қирғизистон ва Тожикистон фуқаролари ўртасида оммавий муштлашув бўлиб ўтганди. Шунингдек, 28 июль куни кечқурун Санкт-Петербургда Чеченистон ва Тожикистон фуқаролари иштирокида яна бир оммавий муштлашув содир этилгани хабар қилинди.
Изоҳ (0)