O‘zbekiston Tashqi mehnat migratsiyasi agentligi Rossiyada so‘nggi vaqtlarda xorijiy davlatlar fuqarolari ishtirokida ommaviy mushtlashuv bilan bog‘liq holatlar ko‘paygani sabab mamlakat fuqarolarini ogohlikka chaqirdi, deb xabar beradi agentlik matbuot xizmati.

Ma’lumotlarga ko‘ra, Rossiya hududida bo‘lib turgan, xususan, vaqtinchalik mehnat faoliyatini amalga oshirayotgan xorijiy davlatlar fuqarolari o‘rtasida yoki ular ishtirokida ommaviy nizoli vaziyatlar soni oshgan. Amur, Moskva va Sverdlovsk viloyatlari, Dog‘iston, Moskva va Sankt-Peterburg shaharlarida ommaviy mushtlashuvlar yuz berib, ushbu hodisalar paytida odamlarning hayoti va sog‘lig‘iga tahdidlar paydo bo‘lgan, huquqni muhofaza qilish organlari xodimlariga qarshi kuch ishlatilgan va transport vositalari harakati to‘sib qo‘yilgan.

Agentlikning ma’lum qilishicha, ommaviy mushtlashuvlarda ishtiroki sabab hibsga olingan xorijiy davlat fuqarolari 15 kunga qamalgan va ularning Rossiya hududiga kirishiga taqiq qo‘yilgan. Agar ushbu fuqarolar 15 kunlik jazo muddatini o‘tagach, mamlakat hududidan mustaqil ravishda chiqib ketmasa, ular majburan chiqarib yuboriladi.

Shuningdek, bu kabi huquqbuzarlik va jinoyatlar sodir etgan chet el fuqarolari Rossiya qonunlariga asosan boshqa ko‘rinishda javobgarlikka tortilishga sabab bo‘lishi ham mumkin.

So‘nggi yillarda chet elliklar orasida bo‘lib o‘tgan eng yirik ommaviy janjallardan biri 2021-yilning 12-iyulidan 13-iyuliga o‘tar kechasi Moskva shahridagi “Kuzminki” metro bekati yonida yuz bergan. Unda 200 nafarga yaqin fuqarolar qatnashgan, ulardan 45 nafari 15 kunga hibsga olingan. Vakolatli organlar tomonidan mojaroning 103 nafar ishtirokchisini deportatsiya qilish to‘g‘risida qaror qabul qilingan.

Huquqni muhofaza qilish organlari ma’lumotlariga ko‘ra, ushbu ommaviy mushtlashuvda O‘zbekiston fuqarolari ishtirok etmagan.

Avvalroq Sankt-Peterburgda Checheniston va Tojikiston fuqarolari ishtirokida ommaviy mushtlashuv sodir bo‘lgani to‘g‘risida xabar berilgandi.