“Tolibon” harakati 19-avgust, payshanba — Afg‘oniston Mustaqillik kunida o‘zlarining AQSh ustidan g‘alabasini e’lon qildi. Bu haqda CNN “Tolibon” bayonotiga tayanib xabar bermoqda.
“Bugun biz Britaniya istilosidan mustaqil bo‘lgan kunimizni nishonlayapmiz (1919-yilda uchinchi ingliz-afg‘on urushidan keyin), ayni paytda esa biz… yana bir baquvvat va kibrli kuchni yengib, uni Afg‘onistonning pok yeridan ketkiza oldik”, — deyiladi “Tolibon” bayonotida.
Unda aytilishicha, Afg‘oniston xalqi “ketma-ket uch asr davomida uchta kiborli imperiya ustidan” g‘alaba qilgan. CNN aniqlik kiritishicha, bular Buyuk Britaniya, Sobiq ittifoq va AQSh.
CNN ma’lumotlariga ko‘ra, keyinroq “Tolibon” butun Afg‘oniston imomlariga murojaat qilib, juma namozlari chog‘ida fuqarolarni mamlakatning bo‘lg‘usi hukumati bilan hamkorlik qilishga ko‘ndirishga da’vat etdi.
Avvalroq Afg‘oniston sharqidagi Kunar viloyatining Asadobod shahrida bo‘lib o‘tgan mitingda bir necha kishi halok bo‘lgan, Mustaqillik kuniga bag‘ishlangan miting ishtirokchilari milliy bayroqlarni silkitayotgan paytida “Tolibon” jangarilari o‘t ochishni boshlagan edi.
Shuningdek, AQSh qo‘shinlarining Afg‘onistondan olib ketilishi kechiktirilishi mumkinligi ma’lum bo‘ldi. Afg‘onistondan AQSh fuqarolarini evakuatsiya qilish uchun zarur bo‘ladigan bo‘lsa, Amerika qo‘shinlari u yerda 31-avgustdan keyin ham qolishi mumkin, deya ma’lum qildi Jo Bayden.
Izoh (0)