Turkiyada konsertlar va kinoteatrlarga tashrif buyurish uchun PZR-test topshirish majburiy bo‘ladi, ushbu chora emlanmagan fuqarolarga tegishli bo‘ladi. Bu haqda Turkiya prezidenti Rajab Toyyib Erdo‘g‘on ma’lum qildi, deb yozadi “RBK”.
“Biz vaksina olmagan talabalar va universitetlar xodimlaridan muntazam ravishda PZR-testlar topshirib turishni so‘raymiz. Biz, shuningdek, parvozlar, shaharlararo safarlar hamda kinoteatr va konsertlarga kirish uchun majburiy testdan o‘tishni joriy qilamiz”, — dedi Erdo‘g‘on.
Uning so‘zlariga ko‘ra, 6-sentabrda o‘quv yili boshlanishi bilan maktablarning emlanmagan o‘qituvchilari va boshqa xodimlari bir haftada kamida ikki marta PZR-test topshirishi kerak bo‘ladi.
Turkiya Sog‘liqni saqlash vazirligi ma’lumotlariga ko‘ra, o‘tgan bir kecha-kunduzda mamlakatda koronavirusga chalinish bo‘yicha 19,3 mingta holat aniqlangan, 216 kishi vafot etgan. Respublikada pandemiya boshidan buyon kasallanganlar soni 6,1 millionga, o‘limlar esa 53,8 mingga yetgan.
Aprel oyi o‘rtalarida Turkiya hukumati COVID-19 ga chalinish holatining ortishi munosabati bilan cheklov choralarini kuchaytirdi. Mamlakatda komendantlik soati davomiyligi soat 19:00 dan 05:00 gacha uzaytirildi. May oyida Turkiyada yangi chora-tadbirlar kuchga kirdi, unga ko‘ra, do‘konlarda faqat asosiy oziq-ovqat va gigiyena mahsulotlarini sotishga ruxsat berildi.
17-maydan mamlakatdagi karantin rejimi bosqichma-bosqich yumshatila boshladi. Xususan, 1-iyundan komendantlik soati qisqartirilib, to‘ylarga ruxsat berildi.
1-iyuldan esa koronavirus fonida qo‘yilgan cheklovlarning bir qismi bekor qilinishi e’lon qilindi. Shu jumladan, komendantlik soati butunlay bekor qilindi.
Izoh (0)