UzAutoSavdo mobil ilovasi orqali Chevrolet Spark avtomobili uchun shartnoma tuzish yana tiklandi. Bu haqda kompaniya matbuot xizmati xabar berdi.
19-avgust kuni ijtimoiy tarmoqlarda UzAuto Motors’ga qarashli ushbu mobil ilova orqali Spark avtomobilini sotish to‘xtab qolgani haqida xabarlar tarqalgandi. Spot’ning kompaniya matbuot xizmatiga tayanib aniqlik kiritishicha, tizim mavjud komplektatsiya bo‘yicha barcha shartnomalarni realizatsiya qilib bo‘lganidan so‘ng o‘zi kontraktatsiya taqdim etishni to‘xtatadi. Ya’ni, kompaniya avtomobil yig‘ish imkoniyati darajasidan ortiq shartnoma tuzmaydi.
UzAuto Motors’ning bildirishicha, butun dunyo avtomobilsozlik sanoatida kuzatilayotgan global mikrochiplarning tanqisligi sababli ularning yetkazilib berilish muddatida biroz kechikishlar bo‘lishi mumkin. Shu sababli tuzilgan yangi shartnomalar bo‘yicha Spark avtomobilini o‘z egalariga yetkazib berish 2022-yilning fevral oyidan boshlanadi.
Davlat statistika qo‘mitasi ma’lumotlariga ko‘ra, O‘zbekistonda 2021-yilning dastlabki olti oyida 108 780 dona yengil avtomobil ishlab chiqarilgan bo‘lib, bu 2020-yilning mos davriga nisbatan 34 675 donaga kam. 2021-yilda deyarli barcha modellarni ishlab chiqarish qisqargan, ayniqsa, bu Spark’ga qattiq ta’sir ko‘rsatgan — ushbu modelni ishlab chiqarish qariyb 60 foizga tushib ketgan.
May oylarida UzAuto Motors yarimo‘tkazgichlar tanqisligi sabab ishlab chiqarish keskin tushib ketgani va oqibatda yetkazib berish muddatlari ham uzayganini ma’lum qilgandi.
Kompaniyaning har bir avtomobilida 100-300 ta yarimo‘tkazgichlardan foydalanilgan ehtiyot qismlar mavjud. Ular spidometr, elektr kuchaytirgich, magnitola, shuningdek, navigatsiya va boshqa joylarda ishlatiladi. GM avtomobil zavodlari har hafta yarimo‘tkazgichlarni global miqyosda taqsimlaydi.
Jarayon to‘rt bosqichga bo‘lingan — ishlab chiqarishdan taqsimlash shtabiga, u yerdan yetkazib beruvchi va avtomobil zavodiga. Masalan, Cobalt uchun modullar Meksikadan, Nexia, Lacetti, Spark uchun esa Janubiy Koreyadan olib kelinadi.
Izoh (0)