“Avto.ru” saytida Yaroslavlda 34,5 ming kilometr yo‘l bosgan 2019-yilgi Lada Vesta Sport 1,2 million rubl (16,2 ming dollar) qiymatida sotuvga qo‘yilgani to‘g‘risida e’lon paydo bo‘ldi. Sotuvchi sedanning bu qadar qimmatligini ko‘p sonli vizual va texnik o‘zgartirishlar kiritgani bilan izohlagan. Bundan tashqari, aynan ushbu modelni 2020-yilda avtobloger Konstantin Zaruskiy lotereya orqali o‘ynagandi, deb xabar beradi Motor.
2020-yilning noyabrida Konstantin Zaruskiy lotereya o‘tkazib, eksklyuziv “Tayfun” rangidagi Luxe jamlanmasiga ega modifikatsiya qilingan Lada Vesta Sport’ni sovringa qo‘ygandi. Bundan tashqari, bloger 400 ming rubl sarflab, sport sedaniga kiritilgan o‘zgartirishlar tasvirlangan ikkita videorolikni ham e’lon qilgan. E’lon qilingan materiallarni 5,5 millionga yaqin odam tomosha qilgan.
Tyuning jarayonida Vesta’ga qo‘shimcha shovqin so‘ndirgich, qizil tormoz supportlari, shuningdek, kuchaytirilgan amortizator va prujinalar o‘rnatilgan. Bundan tashqari, avtomobil Android operatsion tizimi bazasidagi yangi multimediya tizimi, shuningdek, “ko‘r zonalarni” nazorat qilish tizimi va smartfon orqali boshqariladigan signalizatsiya bilan jihozlangan.
Lotereyada g‘oliblikni qo‘lga kiritgan sotuvchining so‘zlariga ko‘ra, hozirda avtomobil ajoyib holatda. Uning amaldagi egasi sport sedanidan faqat dam olish kunlari foydalangan.
Avvalroq Germaniyada Lada Niva bir marta quvvatlanish orqali 300 km yo‘l bosadigan elektromobilga aylantirilgani, Rossiyada oddiy “Volga” eng qimmat Toyota Land Cruiser 300 narxida sotuvga qo‘yilgani to‘g‘risida xabar berilgandi.
Izoh (0)