Amerikaning Tesla kompaniyasi Standard Range Plus modifikatsiyadagi Model 3 elektromobili bilan Yaponiyaning Toyota Camry sedaniga egalik qilish uchun qancha xarajat ketishini taqqosladi. Raqamlarga ko‘ra, sedanlarga besh yil davomida egalik qilish va 60 ming mil (96,5 ming kilometr) yo‘l bosish uchun deyarli bir xil mablag‘ sarflanadi. Shu bilan birga, Amerika elektrokari Audi va BMW kabi nemis raqiblaridan tejamliroq, deb xabar beradi Motor.
Tesla’ning yangi hisobotida ta’kidlanishicha, AQShda Model 3 Standard Range Plus’ning narxi Audi va BMW’ning premium modellari bilan bir xil darajada, biroq elektrokar sedanga egalik qilish Amerika bozoridagi eng mashhur hamyonbop sedan — Toyota Camry’dan arzonroqqa tushadi. Albatta, 100 ming kilometr uchun elektr energiyasiga ketadigan xarajatlar yonilg‘idan ancha arzon, ammo Tesla hisob-kitoblarida amortizatsiya va sug‘urta qiymati ham inobatga olingan. Besh yil davomida Tesla Model 3 ga egalik qilish davomida har bir mil uchun 55 sent sarflashga to‘g‘ri keladi.
Hisob-kitoblar Model 3 sedanining qoldiq qiymatlariga, shuningdek, texnik xizmat ko‘rsatish, elektr energiya va boshqa omillar kabi keng ko‘lamli ma’lumotlar bazasiga asoslangan. Benzin yoki elektr energiyasi, muntazam xizmat ko‘rsatish va shinalar Model 3 uchun Camry xarajatlarining yarmidan sal ko‘prog‘ini tashkil etadi. Ta’kidlanishicha, ma’lumotlarning barchasi 2020-yilga taalluqli, bu vaqt ichida Tesla narxi qimmatlashishga ulgurgan.
Avvalroq eng tezkor Tesla soatiga salkam 100 km tezlikka 1,99 soniyada erishgani, Ilon Mask Tesla’ga endi oddiy rul chambaragi qaytmasligini tasdiqlagani to‘g‘risida xabar berilgandi.
Izoh (0)