11-avgust kuni Visitor Center’da Tokio Olimpiya o‘yinlarida ishtirok etgan O‘zbekiston olimpiya terma jamoasi bilan uchrashuv bo‘lib o‘tdi.
AKFA Group va Artel kompaniyasi rahbarlari va xodimlari sportchilarga jahon sportining eng nufuzli musobaqasida munosib chiqishlari uchun o‘z minnatdorchiligini bildirishdi va barcha ishtirokchilarga estalik sovg‘alarini topshirishdi.
Bugungi kunda O‘zbekiston kompaniyalari sifatli mahsulotlarni eksport qilish orqali jahon bozorini zabt etmoqda, sportchilar esa vatanimiz sharafini himoya qilib, O‘zbekiston nomini jahonga mashhur qilmoqda.
“Ba’zi sportchilarimizga Olimpiya o‘yinlarida medal olish nasib etmadi. Aynan o‘sha sportchilarni ham sa’y-harakatlari qadrlangani meni juda quvontirdi. Artel va AKFA Group kompaniyalari g‘alaba uchun kurashgan barcha ishtirokchilarni rag‘batlantirdi. Bu ishonch sportchilarimizni yangi g‘alabalarga yetaklaydi, eng ulug‘ maqsadlarga erishish uchun kuch beradi”, — deydi bokschi, yozgi Tokio Olimpiya o‘yinlarining oltin medali sohibi Bahodir Jalolov.
Ta’kidlash joizki, Artel va AKFA Group kompaniyalari doimiy ravishda turli sport musobaqalariga homiylik qilib kelmoqda. Joriy yilning aprel oyida Artel kompaniyasi og‘ir atletika bo‘yicha kattalar o‘rtasida o‘tkazilgan Osiyo va Jahon chempionatlariga homiylik qildi, may oyida esa yoshlar o‘rtasida shunday musobaqalar o‘tkazildi. O‘z navbatida, AKFA Group 2021-yil yanvar va may oylarida “Men g‘olib” harbiy-vatanparvarlik musobaqasini qo‘llab-quvvatladi.
Olimpiya o‘yinlari ishtirokchilari bilan uchrashuvda kompaniya rahbarlari Kamran G‘ulomov va Shohrux Ro‘ziqulov sportchilarni har tomonlama qo‘llab-quvvatlashga tayyorligini bildirishdi va ularning har biri yosh avlodga o‘rnak ekanligini ta’kidlab o‘tishdi.
“Afsonaviy sportchimiz Oksana Chusovitinaning matonatli chiqishlarini eslab o‘tish shart. Negaki aynan Oksana Chusovitina sportchilarimizning qanday kuch-qudratga ega ekani, ularning jasorati va matonatining yaqqol misolidir. Olimpiada o‘yinlari tarixida sakkizinchi bor ishtirok etib, rekordini yangilagan sportchimiz hayotida ham, sport maydonida ham doim baland to‘siqlardan sakrab o‘tishni san’at darajasida bizga namoyish etib keldi. Agar mendan yoshlar motivatsiyani kimdan va qayerdan o‘rganishi kerak deb so‘rashsa, Oksana Chusovitinaning hayoti hamda faoliyati bilan tanishib chiqishni maslahat bergan bo‘lardim”, — deydi Artel kompaniyasining boshqaruv raisi Shohrux Ro‘ziqulov.
Uchrashuvda dunyoning eng nufuzli musobaqasida g‘alaba uchun kurashib, vatanimiz sharafini himoya qilish haqiqiy qahramonlik ekanligi ta’kidlandi.
“Olimpiya o‘yinlari sport bayrami va eng sara sportchilar uchun nufuzli musobaqadir. Tokio Olimpiya o‘yinlari kabi musobaqalar uzoq vaqtga yodimizda qoladi. Musobaqaga tayyorgarlik jarayonlari pandemiya tufayli noaniq rejimda o‘tkazildi. Bundan tashqari, barcha sportchilar muxlislar tomonidan to‘liq qo‘llab-quvvatlanmay qoldi, bu esa ishtirokchilar musobaqada katta motivatsiyasiz ishtirok etishdi degani. Ular bo‘sh tribunalar oldida bellashishlariga to‘g‘ri keldi. Ishonchim komil, bu ular uchun kutilmagan holat bo‘lgan. Siz dunyoning yeng yaxshi sportchisi maqomi uchun sharaf bilan kurashdingiz va Tokio Olimpiya o‘yinlarida O‘zbekiston Respublikasini munosib himoya qildingiz. Ko‘plab sportchilar Olimpiya chempioni unvonini orzu qiladi. Biz sportchilarimiz bu nomga munosiblar qatoridan joy olganidan juda baxtiyormiz”, — dedi AKFA Group bosh direktori Kamran G‘ulomov.
Uchrashuvda yig‘ilganlar Miraziz Mirzaxalilov va Tursunoy Rahimova ham musobaqada o‘zini munosib namoyon qilganligi alohida qayd etildi. Sabina Toshkenboyeva betobligi tufayli musobaqalarda qatnasha olmadi. Mazkur uchrashuvda esa uning onasi ishtirok etib, kompaniyalar rahbariyatiga ko‘rsatilgan e’tibor uchun minnatdorchilik bildirdi.
Uchrashuv so‘ngida ishtirokchilar sportchilar sharafiga yozilgan bayramona dasturxon atrofida samimiy suhbatlashishdi. Unda sportchilar erishgan yutuqlari, Olimpiada o‘yinlari yo‘llanmasini qo‘lga kiritguncha bo‘lgan mashaqqatli yo‘li, musobaqalardan olgan taassurotlari haqida so‘zlab berishdi.
Eslatib o‘tamiz, avgust oyida AKFA Group va Artel kompaniyalari Toshkentda ilk Visitor Center ochishdi. Bu o‘ziga xos texnologiyalar markazi bo‘lib, tashrif buyuruvchilarga kompaniyalarning faoliyati bilan interaktiv formatda tanishish imkonini beradi. Bu Markaziy Osiyodagi eng yirik markazlardan biri ekanligini alohida ta’kidlash lozim.
Reklama huquqi asosida.
Izoh (0)