11 август куни Visitor Center’да Токио Олимпия ўйинларида иштирок этган Ўзбекистон олимпия терма жамоаси билан учрашув бўлиб ўтди.
AKFA Group ва Artel компанияси раҳбарлари ва ходимлари спортчиларга жаҳон спортининг энг нуфузли мусобақасида муносиб чиқишлари учун ўз миннатдорчилигини билдиришди ва барча иштирокчиларга эсталик совғаларини топширишди.
Бугунги кунда Ўзбекистон компаниялари сифатли маҳсулотларни экспорт қилиш орқали жаҳон бозорини забт этмоқда, спортчилар эса ватанимиз шарафини ҳимоя қилиб, Ўзбекистон номини жаҳонга машҳур қилмоқда.
«Баъзи спортчиларимизга Олимпия ўйинларида медал олиш насиб этмади. Айнан ўша спортчиларни ҳам саъй-ҳаракатлари қадрлангани мени жуда қувонтирди. Artel ва AKFA Group компаниялари ғалаба учун курашган барча иштирокчиларни рағбатлантирди. Бу ишонч спортчиларимизни янги ғалабаларга етаклайди, энг улуғ мақсадларга эришиш учун куч беради», — дейди боксчи, ёзги Токио Олимпия ўйинларининг олтин медали соҳиби Баҳодир Жалолов.
Таъкидлаш жоизки, Artel ва AKFA Group компаниялари доимий равишда турли спорт мусобақаларига ҳомийлик қилиб келмоқда. Жорий йилнинг апрель ойида Artel компанияси оғир атлетика бўйича катталар ўртасида ўтказилган Осиё ва Жаҳон чемпионатларига ҳомийлик қилди, май ойида эса ёшлар ўртасида шундай мусобақалар ўтказилди. Ўз навбатида, AKFA Group 2021 йил январь ва май ойларида «Мен ғолиб» ҳарбий-ватанпарварлик мусобақасини қўллаб-қувватлади.
Олимпия ўйинлари иштирокчилари билан учрашувда компания раҳбарлари Камран Ғуломов ва Шоҳрух Рўзиқулов спортчиларни ҳар томонлама қўллаб-қувватлашга тайёрлигини билдиришди ва уларнинг ҳар бири ёш авлодга ўрнак эканлигини таъкидлаб ўтишди.
«Афсонавий спортчимиз Оксана Чусовитинанинг матонатли чиқишларини эслаб ўтиш шарт. Негаки айнан Оксана Чусовитина спортчиларимизнинг қандай куч-қудратга эга экани, уларнинг жасорати ва матонатининг яққол мисолидир. Олимпиада ўйинлари тарихида саккизинчи бор иштирок этиб, рекордини янгилаган спортчимиз ҳаётида ҳам, спорт майдонида ҳам, доим баланд тўсиқлардан сакраб ўтишни санъат даражасида бизга намойиш этиб келди. Агар мендан ёшлар мотивацияни кимдан ва қаердан ўрганиши керак деб сўрашса, Оксана Чусовитинанинг ҳаёти ҳамда фаолияти билан танишиб чиқишни маслаҳат берган бўлардим», — дейди Artel компаниясининг бошқарув раиси Шоҳрух Рўзиқулов.
Учрашувда дунёнинг энг нуфузли мусобақасида ғалаба учун курашиб, ватанимиз шарафини ҳимоя қилиш ҳақиқий қаҳрамонлик эканлиги таъкидланди.
«Олимпия ўйинлари спорт байрами ва энг сара спортчилар учун нуфузли мусобақадир. Токио Олимпия ўйинлари каби мусобақалар узоқ вақтга ёдимизда қолади. Мусобақага тайёргарлик жараёнлари пандемия туфайли ноаниқ режимда ўтказилди. Бундан ташқари, барча спортчилар мухлислар томонидан тўлиқ қўллаб-қувватланмай қолди, бу эса иштирокчилар мусобақада катта мотивациясиз иштирок этишди дегани. Улар бўш трибуналар олдида беллашишларига тўғри келди. Ишончим комил, бу улар учун кутилмаган ҳолат бўлган. Сиз дунёнинг енг яхши спортчиси мақоми учун шараф билан курашдингиз ва Токио Олимпия ўйинларида Ўзбекистон Республикасини муносиб ҳимоя қилдингиз. Кўплаб спортчилар Олимпия чемпиони унвонини орзу қилади. Биз спортчиларимиз бу номга муносиблар қаторидан жой олганидан жуда бахтиёрмиз», — деди AKFA Group бош директори Камран Ғуломов.
Учрашувда йиғилганлар Миразиз Мирзахалилов ва Турсуной Раҳимова ҳам мусобақада ўзини муносиб намоён қилганлиги алоҳида қайд этилди. Сабина Тошкенбоева бетоблиги туфайли мусобақаларда қатнаша олмади. Мазкур учрашувда эса унинг онаси иштирок этиб, компаниялар раҳбариятига кўрсатилган эътибор учун миннатдорчилик билдирди.
Учрашув сўнгида иштирокчилар спортчилар шарафига ёзилган байрамона дастурхон атрофида самимий суҳбатлашишди. Унда спортчилар эришган ютуқлари, Олимпиада ўйинлари йўлланмасини қўлга киритгунча бўлган машаққатли йўли, мусобақалардан олган таассуротлари ҳақида сўзлаб беришди.
Эслатиб ўтамиз, август ойида AKFA Group ва Artel компаниялари Тошкентда илк Visitor Center очишди. Бу ўзига хос технологиялар маркази бўлиб, ташриф буюрувчиларга компанияларнинг фаолияти билан интерактив форматда танишиш имконини беради. Бу Марказий Осиёдаги энг йирик марказлардан бири эканлигини алоҳида таъкидлаш лозим.
Реклама ҳуқуқи асосида.
Изоҳ (0)