Imzolangan memorandum doirasida kadrlarni tayyorlash va yosh mutaxassislarning salohiyatini rivojlantirish sohalarida ikki tomonlama hamkorlik amalga oshiriladi.
Mimar Group qurilish kompaniyasi va Toshkent shahridagi Yodju texnika instituti o‘rtasida arxitektura va qurilish sohalaridagi kadrlarni tayyorlash hamda kasbiy rivojlanishlarda qo‘llab-quvvatlashga yo‘naltirilgan hamkorlik memorandumi imzolandi.
10-avgust kuni bo‘lib o‘tgan mazkur tadbirda Mimar Group kompaniyasi direktori Feruzbek Davronov, Toshkent shahridagi Yodju texnika instituti rektori Janpolat Kudaybergenov hamda kompaniyaning HR departamenti xodimlari va ta’lim muassasasining professor o‘qituvchilari ishtirok etishdi.
Uchrashuvda Mimar Group kompaniyasining mahalliy va chet ellik mutaxassislar ishtirokida vorkshoplarni o‘tkazish, talabalarning diplom loyihalarini tayyorlashda ko‘maklashish hamda kompaniyaning qurilish obyektlarida malakaviy amaliyot jarayonini tashkil etishga kelishildi. Shuningdek, Mimar Group xodimlari uchun Yodju institutida ta’lim olish imkoniyatlari muhokama qilindi.
“Yodju instituti bilan yosh mutaxassislarni tayyorlash, ilmiy-amaliy tadqiqotlarni o‘tkazish va boshqa sohalarda o‘zaro hamkorlikni kengaytirishdan manfaatdormiz. Mimar Group arxitektura, qurilish injiniringi, shaharsozlik va dizayn kabi sohalarda ta’lim muassasalari bilan ilm, tajriba almashish muhitni yaratishga intilmoqda. Ishonchim komilki, Mimar Group va Toshkent shahridagi Yodju instituti o‘rtasidagi hamkorlik kadrlarni tayyorlash tizimini yuqori bosqichga ko‘tarishga xizmat qiladi”, — dedi Feruzbek Davronov.
O‘z navbatida, Janpolat Kudaybergenov Mimar Group kompaniyasiga hamkorlik uchun minnatdorchilik bildirib, institut talabalari uchun kasbiy rivojlanish istiqbollari hamda ishga joylashish imkoniyatlari ochilayotganini ta’kidladi. Yodju texnika instituti rektori Mimar Group yosh mutaxassislarning ilmiy hamda ilmiy-amaliy faoliyatiga ko‘maklashadi, deb ishonch bildirdi.
O‘z kadrlar strategiyasi doirasida Mimar Group salohiyatli yosh mutaxassislarni izlab topish, ularning nazariy bilimlarini amaliyotda mustahkamlash hamda kasbiy va shaxsiy o‘sishlariga imkoniyat yaratish orqali malakali, yetuk kadrlarni shakllantirishga katta e’tibor qaratmoqda.
Avvalroq xabar qilinganidek, Mimar Group kompaniyasi Toshkent shahridagi Adju universiteti hamda Toshkent arxitektura-qurilish instituti bilan ham hamkorlik memorandumlarini imzoladi.
Reklama huquqi asosida.
Izoh (0)