Gidrometeorologiya xizmati markazi bergan ma’lumotga ko‘ra, 13—16-avgust kunlari kutilayotgan mahalliy yomg‘irlar sababli O‘zbekistonning tog‘oldi va tog‘li hududlarida sel kelishi xavfi mavjud.
Shu sababli FVV matbuot xizmati tog‘ va tog‘oldi hududlarida yashovchi aholini ehtiyot choralarini ko‘rishga chaqirib, noxush vaziyatlar vujudga kelganda vazirlikning 1050 qisqa raqamiga murojaat etishni so‘radi.
Eslatib o‘tamiz, 13-iyul kuni Qirg‘iziston hududida kuchli yomg‘ir yog‘ishi oqibatida Namangan viloyatining Kosonsoy tumaniga sel kelgandi. Hodisa oqibatida 6 kishi tan jarohati oldi, 9 kishi halok bo‘ldi. Ularning eng kattasi 48, eng kichigi esa 6 yosh bo‘lgan. Seldan jabrlanib, kasalxonalarga jami 24 kishi murojaat qilgan.
Namangan viloyati Pop tumani tog‘li “Imomota” MFY hududlaridagi soyda esa 20-iyul kechasi kuchli sel bir qancha avtoulovlarni oqizib ketdi. Sel oqibatida jabrlangan yoki halok bo‘lganlar yo‘q. Shu kuni yog‘gan kuchli jala oqibatida Namangan shahrining Davlatobod tumanidagi ayrim xonadonlar ham jiddiy zarar ko‘rdi.
Farg‘ona viloyatining So‘x tumanida iyulda uch marta sel kuzatildi, 20 ta xonadon zarar ko‘rdi. Jabrlangan oilalarga yordam pullari tarqatildi.
4-avgust kuni Farg‘ona viloyati So‘x tumani “Hushyor” sel o‘zaniga qo‘shni Qirg‘izistondan sel kelishi oqibatida tumandagi ichki yo‘lni bir-biri bilan bog‘laydigan ko‘prikka zarar yetdi. 6-avgust kuni ushbu tumanga qo‘shni Qirg‘izistondan yana sel keldi. Oqibatda So‘x tumani hududidan o‘tuvchi So‘x—Rishton avtomobil yo‘lining 80 metr qismi loy aralash shag‘alga to‘lib qoldi. Malbut qishlog‘i xo‘jalik ekin maydonlariga hamda “Umbara” (15 ta xonadon) va “Devayron” MFY (25 ta xonadon) hududlaridagi jami 40 ta xo‘jalik tomorqalari, qo‘shimcha bino va uylarning yerto‘lalariga suv kirdi.
Izoh (0)