“Sog‘lom turmush tarzi” (1hls.uz) platformasi 2021-yilning iyul oyi yakuniga ko‘ra, eng ko‘p piyoda yurish bo‘yicha g‘oliblar nomini e’lon qildi. O‘tgan oy yakuni bo‘yicha g‘oliblar ro‘yxatidan 203 kishi o‘rin olgan.
Asosiy mukofot — 1 million so‘m o‘tgan oydagi toshkentlik fuqaroga nasib etgan. Yashnobod tumanida istiqomat qiluvchi 34 yoshli Ulug‘bek Toirov g‘olib deb topilgan. U bir oy davomida 1 million 888 ming 231 qadam tashlagan. Erkak nafaqat tuman, shaharlar kesimida, balki respublika miqyosida ham eng yaxshi natijani ko‘rsatgan. Toirov “sog‘lom turmush tarzi” orqali 1,8 million so‘m ishlab topgan.
Iyul oyida davomida 203 nafar o‘zbekistonlik piyoda yurish orqali jami 68,9 million so‘m ishlagan.
“Sog‘lom turmush tarzi” loyihasida 18 yoshga to‘lgan istalgan inson ishtirok eta oladi. Masalan, o‘tgan oyda Qoraqalpog‘iston Respublikasida istiqomat qiluvchi 72 yoshli erkak g‘oliblar qatoridan o‘rin olgan. U bir oy davomida 667 ming 600 qadam tashlab, 300 ming so‘m ishlab olgan.
Ma’lumot uchun, aholi o‘rtasida piyoda yurish va yugurishni ommalashtirish uchun ishga tushiriladigan “Sog‘lom turmush tarzi” platformasi alkogol va sigaret sotuvchilaridan olinadigan maxsus yig‘im hisobiga moliyalashtiriladi.
Izoh (0)