Afg‘onistonda kuzatuvlar boshlanganidan buyon bolalar to‘yib ovqatlanmasligining eng keskin o‘sishi qayd etildi. Bu haqda BMTning Jahon oziq-ovqat dasturi bayonotiga asoslanib CNN telekanali xabar bermoqda.
Tashkilot hisob-kitoblariga ko‘ra, mamlakat aholisining to‘rtdan bir qismi - qariyb 10 million kishi — o‘tkir oziq-ovqat tanqisligidan aziyat chekmoqda. Afg‘onistondagi har uchinchi bola surunkali to‘yib ovqatlanmaslik tufayli o‘sishdan orqada qolmoqda.
Ta’kidlanishicha, vaziyatning keskinlashuvi so‘nggi ikki yil ichida gumanitar oziq-ovqat yordami hajmining qisqarishi bilan bog‘liq. Bunga moliyaviy qo‘llab-quvvatlashning sezilarli darajada kamayishi sabab bo‘lgan. Xususan, joriy yilning aprel oyida AQSH prezidenti Donald Tramp ma’muriyati dunyoning eng kambag‘al mamlakatlaridan biri bo‘lgan Afg‘onistonga oziq-ovqat yetkazib berishni butunlay to‘xtatdi.
“Oziq-ovqat xavfsizligining yomonlashuviga qo‘shimcha omil sifatida qo‘shni mamlakatlardan afg‘onlarning ommaviy ravishda qaytishi bo‘ldi. Bu mamlakatlarda noqonuniy muhojirlar deb tan olingan chet elliklarning deportatsiyasi kuchaygan edi. So‘nggi ikki oy ichida Jahon oziq-ovqat dasturi Erondan qaytgan 60 ming kishini qo‘llab-quvvatladi”, deyiladi hisobotda.
Jahon oziq-ovqat dasturi vakili Ziyouddin Safiyning aytishicha, Erondan qaytayotgan barcha muhtoj afg‘onlarga yordam berish uchun 15 million dollar zarur. Umuman olganda, 2026-yil yanvarigacha butun mamlakat bo‘ylab eng zaif oilalarni qo‘llab-quvvatlash uchun dastur 539 million dollarga muhtoj.
Bundan tashqari, Afg‘onistondagi oziq-ovqat bilan bog‘liq vaziyatni iqlim inqirozi yanada og‘irlashtirmoqda. Atrof-muhitni muhofaza qilish milliy agentligi rahbari Matiulla Xalisning so‘zlariga ko‘ra, qurg‘oqchilik, suv tanqisligi, unumdor yerlarning qisqarishi va to‘satdan yuz beradigan suv toshqinlari aholi hayotiga ham, mamlakat iqtisodiyotiga ham jiddiy ta’sir ko‘rsatmoqda.
Bundan avval BMT Bolalar jamg‘armasi (UNICEF) G‘azoda ocharchilik xavfi keskin ortib borayotganini va har uchinchi inson bir necha kunlab ovqatsiz qolayotganini ma’lum qilgandi. Tashkilotning ta’kidlashicha, ocharchilik sabab halok bo‘lganlar soni 162 nafarga yetgan, shundan 92 nafari bolalardir.
Aprel oyida Birlashgan Millatlar Tashkiloti G‘arbiy va Markaziy Afrikada narxlarning oshishi sababli, yaqin oylarda 55 millionga yaqin odam ocharchilik bilan kurashishga to‘g‘ri kelishi haqida ogohlantirgandi.
Izoh (0)