Namangan viloyatining Kosonsoy tumanidagi qutqaruv-qidiruv ishlari natijasida 7 yashar bolaning jasadi topildi. Bu haqda “Daryo” muxbiri Azizbek Abduvaliyev xabar bermoqda.

Foto: “Daryo” / Jahongir Akramov

Qutqaruv-qidiruv ishlari 2021-yil 13-iyuldan beri davom etayotgan bo‘lib, unda FVB, Milliy gvardiya, IIB va ko‘ngillilar ishtirok etgan.

Bolaning jasadi bugun, 17-iyul kuni tongda Kosonsoy soyining tumandagi “Tagijar” mahallasidan oqib o‘tuvchi qismidan topildi. Hozirda uning shaxsiga aniqlik kiritish ishlari olib borilmoqda.

Eslatib o‘tamiz, oldinroq Namangan shahridagi Azimjon Ahmadjonov Kosonsoyga yopirilgan sel oqibatida ikki o‘g‘lini yo‘qotgani, ulardan biri — 6 yoshli Abubakr Rustamov topilgani va 14-iyul kuni dafn etilgani, ikkinchisi — 2014-yilda tug‘ilgan Muhammadyusuf Rustamov esa qidirilayotgani haqida xabar berilgandi.

Shu tariqa, Kosonsoyga sel yopirilishi oqibatida halok bo‘lganlar soni 9 kishiga yetdi.