Toshkentda fuqaroni Qirg‘izistonda joylashgan tibbiyot yo‘nalishidagi oliy o‘quv yurtiga kiritib qo‘yish evaziga 7,3 ming dollar so‘ragan shaxslar ushlandi. Bu haqda Bosh prokuratura huzuridagi departament xabar berdi.
Ma’lum qilinishicha, departament hamda DXXning Chilonzor tumani bo‘limlari tomonidan tezkor tadbir o‘tkazilgan. Tadbir davomida B.A. ismli shaxs va boshqalar fuqaro A.ni Qirg‘izistonning tibbiyot yo‘nalishidagi oliy o‘quv yurtiga o‘qishga kiritib, keyinchalik o‘qishini Andijon davlat tibbiyot institutiga ko‘chirish masalasini yuqori lavozimda ishlovchi tanishlari orqali ijobiy hal qilib berishni va’da qilgani aniqlangan. Buning evaziga B.A. oldindan kelishilgan 7,3 ming AQSh dollari hisobidan 35,5 million so‘mni olgan vaqtida ashyoviy dalillar bilan ushlangan.
Shuningdek, departamentning Yuqori Chirchiq tuman bo‘limi hamda DXXning Toshkent viloyati boshqarmasi tomonidan o‘tkazilgan tezkor tadbirda Sh.I. ismli shaxs boshqa bir fuqaroni Chirchiq pedagogika institutiga kontrakt asosida ushbu institutda ishlovchi tanishlari orqali o‘qishga kiritib qo‘yishni va’da qilgani aniqlangan. Sh.I. oldindan kelishilgan 3 ming dollarning 1000 dollarini olgan vaqtida ashyoviy dalillar bilan qo‘lga olingan.
Muqaddam 4 marotaba firibgarlik jinoyatlari uchun sudlangan N.T. fuqaro T.ning o‘g‘lini Ichki ishlar akademiyasiga tanishlari orqali o‘qishga kiritib qo‘yishga ishontirib, evaziga 1000 dollarni firibgarlik yo‘li bilan olgan vaqtida departamentning Muzrabot tumani bo‘limi xodimlari tomonidan ashyoviy dalillar bilan ushlangan.
Bundan tashqari, departamentning Buxoro tuman bo‘limi hamda DXXning Buxoro viloyat boshqarmasi tomonidan o‘tkazilgan tezkor tadbirda fuqaro M.Q. boshqa bir fuqaroning hujjatlarini “Transfer.dtm.uz” saytida ro‘yxatdan o‘tkazib, Qozog‘istondagi institutga bormasdan turib bir yil o‘qigani haqida sertifikat va transkript hujjatlarini tanishlari orqali tayyorlab berishni va’da qilgan. Xizmati evaziga u 900 AQSh dollarini olgan vaqtida ashyoviy dalillar bilan qo‘lga olingan.
Departament hamda DXXning Samarqand viloyati boshqarmalari tomonidan o‘tkazilgan tezkor tadbirda esa Samarqand davlat chet tillar instituti fakultet dekani o‘rinbosari S.I. fuqaro N.ning ushbu institutda ta’lim olayotgan qizini yakuniy nazorat imtihonidan o‘tkazib berish evaziga 550 dollarni olgan vaqtida ashyoviy dalillar bilan ushlangan.
Hozirda mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijonda fuqaroni Qirg‘izistonga o‘qishga kiritib qo‘yish evaziga 1,4 ming dollar so‘ragan universitet o‘qituvchisi qo‘lga olingani, Andijon va Xorazmda pul evaziga abituriyentlarni o‘qishga kiritib qo‘yishni va’da qilgan institut hisobchisi va talaba ushlangani, Andijonda fuqaroning o‘qishini 1500 dollar evaziga O‘shdan Namanganga ko‘chirib berishni va’da qilgan talaba qo‘lga olingani to‘g‘risida xabar berilgandi.
Izoh (0)