Тошкентда фуқарони Қирғизистонда жойлашган тиббиёт йўналишидаги олий ўқув юртига киритиб қўйиш эвазига 7,3 минг доллар сўраган шахслар ушланди. Бу ҳақда Бош прокуратура ҳузуридаги департамент хабар берди.
Маълум қилинишича, департамент ҳамда ДХХнинг Чилонзор тумани бўлимлари томонидан тезкор тадбир ўтказилган. Тадбир давомида Б.А. исмли шахс ва бошқалар фуқаро А.ни Қирғизистоннинг тиббиёт йўналишидаги олий ўқув юртига ўқишга киритиб, кейинчалик ўқишини Андижон давлат тиббиёт институтига кўчириш масаласини юқори лавозимда ишловчи танишлари орқали ижобий ҳал қилиб беришни ваъда қилгани аниқланган. Бунинг эвазига Б.А. олдиндан келишилган 7,3 минг АҚШ доллари ҳисобидан 35,5 миллион сўмни олган вақтида ашёвий далиллар билан ушланган.
Шунингдек, департаментнинг Юқори Чирчиқ туман бўлими ҳамда ДХХнинг Тошкент вилояти бошқармаси томонидан ўтказилган тезкор тадбирда Ш.И. исмли шахс бошқа бир фуқарони Чирчиқ педагогика институтига контракт асосида ушбу институтда ишловчи танишлари орқали ўқишга киритиб қўйишни ваъда қилгани аниқланган. Ш.И. олдиндан келишилган 3 минг долларнинг 1000 долларини олган вақтида ашёвий далиллар билан қўлга олинган.
Муқаддам 4 маротаба фирибгарлик жиноятлари учун судланган Н.Т. фуқаро Т.нинг ўғлини Ички ишлар академиясига танишлари орқали ўқишга киритиб қўйишга ишонтириб, эвазига 1000 долларни фирибгарлик йўли билан олган вақтида департаментнинг Музработ тумани бўлими ходимлари томонидан ашёвий далиллар билан ушланган.
Бундан ташқари, департаментнинг Бухоро туман бўлими ҳамда ДХХнинг Бухоро вилоят бошқармаси томонидан ўтказилган тезкор тадбирда фуқаро М.Қ. бошқа бир фуқаронинг ҳужжатларини «Transfer.dtm.uz» сайтида рўйхатдан ўтказиб, Қозоғистондаги институтга бормасдан туриб бир йил ўқигани ҳақида сертификат ва транскрипт ҳужжатларини танишлари орқали тайёрлаб беришни ваъда қилган. Хизмати эвазига у 900 АҚШ долларини олган вақтида ашёвий далиллар билан қўлга олинган.
Департамент ҳамда ДХХнинг Самарқанд вилояти бошқармалари томонидан ўтказилган тезкор тадбирда эса Самарқанд давлат чет тиллар институти факультет декани ўринбосари С.И. фуқаро Н.нинг ушбу институтда таълим олаётган қизини якуний назорат имтиҳонидан ўтказиб бериш эвазига 550 долларни олган вақтида ашёвий далиллар билан ушланган.
Ҳозирда мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Андижонда фуқарони Қирғизистонга ўқишга киритиб қўйиш эвазига 1,4 минг доллар сўраган университет ўқитувчиси қўлга олингани, Андижон ва Хоразмда пул эвазига абитуриентларни ўқишга киритиб қўйишни ваъда қилган институт ҳисобчиси ва талаба ушлангани, Андижонда фуқаронинг ўқишини 1500 доллар эвазига Ўшдан Наманганга кўчириб беришни ваъда қилган талаба қўлга олингани тўғрисида хабар берилганди.
Изоҳ (0)