Rossiyaning Sizran shahridagi chorvachilik fermasida majburiy mehnatga jalb qilingan ikki o‘zbekistonlikka yordam berildi. Bu haqda Tashqi mehnat migratsiyasi agentligi xabar berdi.
Ma’lum qilinishicha, o‘zbekistonlik migrant A.A. agentlikning Rossiyaning Samara shahridagi vakolatxonasiga murojaat qilib, Sizran shahridagi chorvachilik fermasida ishlab, oylik ish haqini ololmayotgani, pasporti olib qo‘yilib, jismoniy kuch ishlatilganini ma’lum qilgan.
Vakolatxona xodimlari tomonidan o‘rnatilgan tartibda telefon orqali hududiy ichki ishlar bo‘limiga murojaat qilingan, lekin ichki ishlar xodimlari kelib, ushbu fuqaroni so‘rovdan o‘tkazgan va yana ushbu ish beruvchi qo‘liga topshirgan.
Muammo vakolatxona xodimlari tomonidan joyiga chiqib o‘rganilgan hamda fuqaroning pasporti va 12 ming rubl oylik maoshi undirib berilgan.
Shuningdek, mazkur fermada ishlayotgan O‘zbekistonning yana bir fuqarosi R.J. ham pasporti olib qo‘yilib, majburiy mehnatga jalb qilinayotgani aniqlangan. Uning ham hujjati olib berilib, har ikki fuqaro boshqa ishga joylashtirilgan.
Bundan avval Rossiyaning Samara viloyatidagi issiqxonada majburiy mehnatdan ozod qilinishini so‘ragan 6 nafar o‘zbekistonlikka yordam berilgani, Primorsk o‘lkasida ish beruvchi tomonidan pasportlari olib qo‘yilgan o‘zbekistonliklarga yordam berilgani haqida xabar berilgan edi.
Izoh (0)