Samarqand viloyati Past Darg‘om tumanida 1 gektar yer maydonini rasmiylashtirib berish evaziga 200 ming dollar talab qilgan shaxslar qo‘lga olindi, deb xabar beradi viloyati IIB axborot xizmati.
Ma’lum qilinishicha, Davlat xavfsizlik xizmati Samarqand viloyati boshqarmasi hamda viloyat IIB xodimlari tomonidan viloyatdagi huquqni muhofaza qiluvchi idoralar bilan hamkorlikda tezkor tadbir o‘tkazilgan.
Ma’lumotlarga ko‘ra, R.Sh. ismli 33 yoshli xususiy tadbirkor qarindoshi 66 yoshli G‘.N. bilan o‘zaro jinoiy til biriktirib, tumanning “Do‘stlik” massividagi “Kimyogarlar” mahallasi hududidan yengil konstruksiyali issiqxona qurish uchun ajratilgan 1 gektar yer maydonini fuqaro A.Sh.ga rasmiylashtirib bermoqchi bo‘lgan.
O‘tkazilgan tezkor tadbir davomida R.Sh. va G‘.N. mazkur fuqarodan kelishilgan mablag‘ning 190 ming AQSh dollarini olayotgan vaqtida jinoyat ustida ashyoviy dalillar bilan qo‘lga olingan.
Hozirda ushbu shaxslarga nisbatan tergovga qadar tekshiruv tadbirlari olib borilmoqda.
Avvalroq Andijonda sud orqali yerdan foydalanish huquqini beruvchi qarorni chiqartirib berishni va’da qilib, 300 dollar olgan shaxs qo‘lga olingani, Buxoroda hokimlik zaxirasidagi 16 sotix yerni 14 ming dollarga sotishga uringan shaxs ushlangani, Farg‘ona, Namangan va Surxondaryoda yerni noqonuniy ravishda sotayotgan shaxslar qo‘lga olingani, Sirdaryoda hokimlik zaxirasidagi 14 gektar yerni 30 ming dollar evaziga rasmiylashtirib berishga uringan ota-bola aniqlangani, Farg‘onada 50 sotix yerni 25 ming dollarga noqonuniy sotmoqchi bo‘lgan MChJ boshlig‘i ushlangani hamda DXX Bo‘stonliqda ot sportiga ajratilgan 25,4 gektar yerni 1,5 million dollarga sotmoqchi bo‘lgan shaxsni qo‘lga olgani haqida xabar berilgandi.
Izoh (0)