Rossiya hududida ommaviy mushtlashuvlarda qatnashadigan chet elliklar mamlakatdan chiqarib yuboriladi va qaytib kirishi taqiqlanadi. Bu haqda Rossiya Ichki ishlar vazirligi saytida tegishli ogohlantirish joylashtirilgan, deb yozadi Asia-Plus.
“So‘nggi paytlarda chet el fuqarolari ishtirokidagi ziddiyatlar tez-tez sodir etilmoqda, ularning ayrimlari yirik va ommaviy tarzda kechgan. To‘qnashuvlar Rossiya Federatsiyasining bir qator subyektlarida: Amur, Moskva va Sverdlovsk viloyatlarida, Dog‘iston Respublikasida, Moskva va Sankt-Peterburgda kuzatilgan”, — deyiladi xabarda.
Qayd etilishicha, chet el fuqarolarining noqonuniy faoliyati fuqarolarning hayoti va xavfsizligiga tahdid soluvchi zo‘ravonlik harakatlariga, shuningdek, davlat xizmatchilariga qarshi kuch ishlatishga, davlat organlarining, transport harakatining normal faoliyatiga to‘sqinlik qilishga olib kelmoqda.
Xabarga ko‘ra, xorijiy fuqarolarga nisbatan sud organlari ma’muriy javobgarlikka tortish to‘g‘risida qaror qabul qilgan, unda 15 kunlik ma’muriy hibsga olish tarzida jazo tayinlash nazarda tutiladi.
“Sodir etilgan xatti-harakatlarning jamoat xavfsizligiga zararini hisobga olgan holda, ushbu xorijiy fuqarolarning Rossiyaga kirishiga ruxsat berilmaslik to‘g‘risida qaror qabul qilindi. Agar ular Rossiya Federatsiyasi hududidan o‘zlari chiqib ketmasa, ularni deportatsiya qilish choralari ko‘riladi” — deyiladi xabarda.
Shu bilan birga, Rossiya Ichki ishlar vazirligi qayd etishicha, fuqarolarning huquqlari va qonuniy manfaatlarini himoya qilish uchun Rossiya qonunchiligida ko‘zda tutilgan barcha choralar jamoat tartibi va xavfsizligini buzuvchi harakatlarning oldini olish uchun qabul qilingan va qabul qilinadi.
“Huquqbuzarliklar va jinoyatlar sodir etgan chet el fuqarolari qonun hujjatlarida belgilangan tartibda javobgarlikka tortiladi”, — deyiladi xabar xulosasida.
Eslatib o‘tamiz, 12-iyul kuni Moskvaning “Kuzminki” metro bekati yaqinida 180 dan ortiq kishi ishtirokida ommaviy mushtlashuv sodir etilgandi. Dastlab mojaro O‘zbekiston va Qirg‘iziston fuqarolari o‘rtasida chiqqani aytilgan. O‘zbekiston Tashqi migratsiya agentligi Rossiya Ichki ishlar vazirligi xodimlari bilan muloqotda bo‘lib, vaziyatni o‘rgandi va mojaroda o‘zbekistonliklar ishtirok etmaganini ma’lum qildi.
Mushtlashuv Tojikiston va Qirg‘iziston fuqarolari o‘rtasida yuz bergan. Janjal ishtirokchilari sud qarori bilan Rossiyadan chiqarib yuborilishi xabar qilindi.
Avvalroq Moskvadagi kafeda Qirg‘iziston va Tojikiston fuqarolari o‘rtasida ommaviy mushtlashuv bo‘lib o‘tgandi.
Izoh (0)