Nyu-York ma’muriyati koronavirusga qarshi emlanish evaziga shahar aholisiga pul to‘lashni boshlaydi. Bu haqda shahar meri Bill De Blazioga tayanib, Meduza xabar berdi.
“Shahardagi vaksinatsiya punktlaridan birida COVID-19’ga qarshi vaksinaning birinchi dozasini oling va 100 dollarga ega bo‘ling”, — deyiladi merning Twitter’dagi xabarida
Shaharda tashkil qilingan 443 ta vaksinatsiya punktlaridan birida 30-iyuldan boshlab birinchi inyeksiyani olgan har bir kishiga shahar hokimligi 100 dollar to‘laydi. Pul olish uchun aholi vaksinatsiyadan oldin maxsus veb-saytda ro‘yxatdan o‘tishi kerak.
Nyu-York merining so‘zlariga ko‘ra, aholining vaksinaga bo‘lgan talabini qondirish uchun shifokorlar 10 million doza vaksinani maxsus zaxiralab qo‘ygan.
Bu Nyu-York ma’muriyatining aholini rag‘batlantirish va emlash darajasini oshirish bo‘yicha birinchi urinishi emas. May oyida shtat gubernatori Endryu Kuomo fuqarolarni emlanishga va buning evaziga 5 million dollar yutuqdan iborat lotereya chiptasini qo‘lga kiritishga chaqirgandi.
Mavzuga doir: 1,5 mln dollarlik mukofot, bepul pitssa va tovuq. Jahonda COVID-19’ga qarshi emlanganlar qanday rag‘batlantirilmoqda?
Amerikaning Jons Hopkins universiteti ma’lumotlariga ko‘ra, Nyu-York shahrida 4,4 million aholi to‘liq emlandi, Nyu-York shtatida esa 11 million, bu aholining 56 foizini tashkil qiladi.
Shuningdek, o‘tgan kun davomida Nyu-Yorkda 929 kishida COVID-19 aniqlandi, 108 bemorni kasalxonaga yotqizishga to‘g‘ri keldi. Bir hafta davomida Nyu-York aholisining o‘rtacha 2,5 foizida koronavirus tasdiqlangan.
Izoh (0)