Facebook, Google va Netflix kompaniyalari koronavirusga qarshi majburiy vaksinatsiya joriy qildi

Facebook va Google kompaniyalarining ma’lum qilishicha, masofadan ishlayotgan xodimlar ofisga qaytishidan avval koronavirusga qarshi emlanishi lozim. Netflix aktyorlar va syomka maydonida ular bilan aloqada bo‘ladigan boshqa xodimlarni majburiy vaksinatsiyadan o‘tkazish haqida e’lon qildi. Ushbu kompaniyalarda shu paytgacha qancha xodim emlangani haqida ma’lumot berilmagan.

Google bosh direktori Sundara Pichayning aytishicha, xodimlarni majburiy emlash talabi avval AQShdagi ofislarga taalluqli bo‘ladi, keyinchalik esa boshqa mamlakatlardagi bo‘linmalarga tatbiq etiladi. Kompaniya xodimlari mahalliy qonunlarga muvofiq emlanadi, deya xabar berdi AFP.

Facebook ham shu kabi choralarni kiritdi. “Biz AQShdagi istalgan ofisimizga ishlash uchun keladiganlarning barchasidan emlanishni talab qilamiz”, — dedi kadrlar bilan ishlash bo‘yicha vitse-prezident Lori Gouler. Uning so‘zlariga ko‘ra, kompaniya tibbiy va boshqa sabablarga ko‘ra emlana olmaydiganlarni ishga qaytarish masalasini ko‘rib chiqadi.

Netflix aktyorlar va syomka maydonlaridagi ishchilar COVID-19’ga qarshi emlanishni majburiy etib qo‘ydi, tibbiy va diniy sabablarga ko‘ra yoki yosh cheklovlari sabab emlanishdan bosh tortish mumkin, deya xabar berdi Hollywood Reporter.

Shuningdek, avvalroq yaratish boshlangan loyihalar ishtirokchilari vaksina olmay turishi mumkin. Kompaniya Kino va televideniye prodyuserlari alyansi, Kinoaktyorlar gildiyasi — Amerika televizion va radio ijodkorlari federatsiyasi, kasaba uyushmalari va sohaning boshqa tashkilotlari bilan qoidalarni kelishib oldi.

Pandemiya boshidan buyon Qo‘shma Shtatlarda 34,6 million kishida koronavirus aniqlandi, 611,8 ming kishi kasallikdan vafot etdi. Kasallanish va o‘limlar soni bo‘yicha AQSh dunyoda birinchi o‘rinda turadi.

Jahon sog‘liqni saqlash tashkiloti ma’lumotlariga ko‘ra, so‘nggi bir hafta ichida dunyoda COVID-19 bilan kasallanish 8 foizga, o‘lim darajasi esa 21 foizga oshgan.