Germaniyadagi kimyo zavodidagi portlashdan keyin bedarak yo‘qolganlar rasman halok bo‘lgan deb topildi

Germaniyaning Leverkuzen shahrida kimyo zavodida yuz bergan portlashdan keyin bedarak yo‘qolgan besh nafar odam rasman halok bo‘lgan deb topildi. Bu haqda Chempark sanoat zonasining Currenta kompaniyasi direktori Frenk Xildmar 28-iyulda o‘tkazilgan matbuot anjumanida ma’lum qilgan, deb yozmoqda “Korrespondent.net”.

Shu tariqa zavodda sodir bo‘lgan portlash hamda yong‘in oqibatida halok bo‘lganlar soni 7 nafarga yetdi.

“Afsuski, vaziyatga to‘g‘ri baho berib, besh nafar bedarak yo‘qolgan odamlarni endi tirik topa olmasligimizni tushunishimiz kerak”, – degan Xildmar.

U yo‘qolganlarning 4 nafari Currenta, yana bir kishi esa boshqa bir firma xodimi bo‘lganini qo‘shimcha qilgan. Xildmar ularning yaqinlariga hamdardlik bildirib, besh nafar kishining endi tirik topilishiga umid yo‘qligini aytgan.

Ayni vaqtda portlashdan keyin shahardagi havoning zararlanganlik darajasi tekshirilmoqda, chiqindilarning inson salomatligiga ziyon yetkazadigan darajada havoda tarqalmagani aniqlangan.

Currenta boshqaruvining boshqa bir vakili Hans Hennen portlab ketgan sisternada nima modda bo‘lgani aniqlangani, biroq hodisaga nima sabab bo‘lgani haqida gapirishga hali erta ekanini bildirgan.

“Albatta sisterna ichida nima bo‘lganini yaxshi bilamiz, biroq uning ichida qanday modda bo‘lgani bilan, hodisaga nima sabab ekanini aniqlash o‘rtasida keskin farq mavjud. Favqulodda vaziyatni taftish qilayotgan idoralar bilan doimiy ravishda aloqada bo‘lib turibmiz, voqealar zanjirini tuzib chiqayapmiz, shu sababli hodisaning taxminiy sababini oldindan aytoqchi emasman, biz faqat sisterna ichida nima bo‘lganini bilamiz”, – deya sisternada nima bo‘lganini mavhum qoldirgan Hennen.

Uning so‘zlariga ko‘ra zararning aniq miqdori ma’lum emas, voqea sodir bo‘lgan joyda hanuzgacha favqulodda xizmatlarning vakillari ishlamoqda.

“Hayotimda bunday favqulodda holatni hali ko‘rmaganman, bu juda kam sodir bo‘ladigan hodisa”, – deya matbuot anjumanida o‘z so‘zlariga yakun yasagan Hennen.

Eslatib o‘tamiz, Leverkuzendagi Chempark sanoat hududidagi portlash 27-iyul kuni tongda kimyo sanoatining mamlakatdagi eng katta obyektlaridan birida sodir bo‘lgan. Portlashning aniq sabablari hali oshkor qilinmagan. Hodisa oqibatida halok bo‘lganlardan tashqari yana 31 kishi turli darajada jarohat olgan.