Россияда оммавий муштлашувларда қатнашадиган муҳожирлар мамлакатдан чиқариб юборилади

Россия ҳудудида оммавий муштлашувларда қатнашадиган чет элликлар мамлакатдан чиқариб юборилади ва қайтиб кириши тақиқланади. Бу ҳақда Россия Ички ишлар вазирлиги сайтида тегишли огоҳлантириш жойлаштирилган, деб ёзади Asia-Plus.

«Сўнгги пайтларда чет эл фуқаролари иштирокидаги зиддиятлар тез-тез содир этилмоқда, уларнинг айримлари йирик ва оммавий тарзда кечган. Тўқнашувлар Россия Федерациясининг бир қатор субъектларида: Амур, Москва ва Свердловск вилоятларида, Доғистон Республикасида, Москва ва Санкт-Петербургда кузатилган», — дейилади хабарда.

Қайд этилишича, чет эл фуқароларининг ноқонуний фаолияти фуқароларнинг ҳаёти ва хавфсизлигига таҳдид солувчи зўравонлик ҳаракатларига, шунингдек, давлат хизматчиларига қарши куч ишлатишга, давлат органларининг, транспорт ҳаракатининг нормал фаолиятига тўсқинлик қилишга олиб келмоқда.

Хабарга кўра, хорижий фуқароларга нисбатан суд органлари маъмурий жавобгарликка тортиш тўғрисида қарор қабул қилган, унда 15 кунлик маъмурий ҳибсга олиш тарзида жазо тайинлаш назарда тутилади.

«Содир этилган хатти-ҳаракатларнинг жамоат хавфсизлигига зарарини ҳисобга олган ҳолда, ушбу хорижий фуқароларнинг Россияга киришига рухсат берилмаслик тўғрисида қарор қабул қилинди. Агар улар Россия Федерацияси ҳудудидан ўзлари чиқиб кетмаса, уларни депортация қилиш чоралари кўрилади» — дейилади хабарда.

Шу билан бирга, Россия Ички ишлар вазирлиги қайд этишича, фуқароларнинг ҳуқуқлари ва қонуний манфаатларини ҳимоя қилиш учун Россия қонунчилигида кўзда тутилган барча чоралар жамоат тартиби ва хавфсизлигини бузувчи ҳаракатларнинг олдини олиш учун қабул қилинган ва қабул қилинади.

«Ҳуқуқбузарликлар ва жиноятлар содир этган чет эл фуқаролари қонун ҳужжатларида белгиланган тартибда жавобгарликка тортилади», — дейилади хабар хулосасида.

Эслатиб ўтамиз, 12 июль куни Москванинг «Кузминки» метро бекати яқинида 180 дан ортиқ киши иштирокида оммавий муштлашув содир этилганди. Дастлаб можаро Ўзбекистон ва Қирғизистон фуқаролари ўртасида чиққани айтилган. Ўзбекистон Ташқи миграция агентлиги Россия Ички ишлар вазирлиги ходимлари билан мулоқотда бўлиб, вазиятни ўрганди ва можарода ўзбекистонликлар иштирок этмаганини маълум қилди.

Муштлашув Тожикистон ва Қирғизистон фуқаролари ўртасида юз берган. Жанжал иштирокчилари суд қарори билан Россиядан чиқариб юборилиши хабар қилинди.

Аввалроқ Москвадаги кафеда Қирғизистон ва Тожикистон фуқаролари ўртасида оммавий муштлашув бўлиб ўтганди.