Turkiya va Ozarbayjon qo‘shma turk armiyasini tashkil etish bo‘yicha muzokaralar olib bormoqda. Bu haqda Turkiya parlamenti spikeri Mustafo Shentop matbuot anjumani chog‘ida ma’lum qildi, deb yozmoqda “RBK”.
“Bizning g‘oyamiz — bir millat, ikki davlat. Har doim shunday bo‘ladi. Shuning munosabati bilan ko‘plab muzokaralar va kelishuvlar bo‘lib o‘tdi”, — dedi Mustafo Shentop.
Uning so‘zlariga ko‘ra, kelishuvlar doirasida, xususan, ikki mamlakatning harbiy mashg‘ulotlari o‘tkazilmoqda. Uning ta’kidlashicha, Boku va Anqara iqtisodiy hamkorlikni kuchaytirish bo‘yicha choralar ko‘rmoqda.
“Ma’lumki, shu yilning mart oyida Turkiya va Ozarbayjon o‘rtasida imtiyozli savdo to‘g‘risida bitim tasdiqlangandi. Ayni paytda erkin savdo shartnomasi ustida ish olib borilmoqda. Imzolangandan so‘ng ushbu hujjat bizning iqtisodiy aloqalarimizni yanada mustahkamlaydi”, — dedi siyosatchi.
Armaniston va Ozarbayjon chegarasidagi vaziyat haqida gapirar ekan, Shentop Armaniston harbiylari tomonidan Ozarbayjonning chegaraoldi hududlari o‘qqa tutilishi mintaqaning xavfsizligiga tahdid, shuningdek, hududiy urushga olib kelishi mumkinligini aytdi.
“Agar bu provokatsiyalar to‘xtamasa, unda yanada achchiq oqibatlar muqarrar. Jahon hamjamiyati Armanistonni mintaqa tinchligiga tahdid soluvchi provokatsiyalarni to‘xtatishga chaqirishi lozim”, — deya qo‘shimcha qildi u.
Shuningdek, parlament spikeri Zangezur yo‘lagini ochish Ozarbayjon uchun ham, Turkiya uchun ham muhim ekanini ta’kidladi. Uning so‘zlariga ko‘ra, bu Ozarbayjonning asosiy qismi va Naxichevan, Ozarbayjon va Turkiya, shuningdek, Turkiya va Osiyo mamlakatlari o‘rtasida quruqlik yo‘lini yaratishga yordam beradi. “Tegishli kelishuvga erishildi, endi barcha tomonlar o‘z so‘zida turishi lozim. Yo‘lak ochiq bo‘lishi kerak ”, — deya xulosa qildi Shentop.
Iyun oyida Turkiya va Ozarbayjon prezidentlari ittifoqchilik to‘g‘risida deklaratsiya imzolagandi. Kelishuvdan so‘ng Turkiya prezidenti Rajab Erdo‘g‘on Ozarbayjonda Turkiya harbiy bazasi yaratilishi mumkinligini istisno qilmagan.
2020-yilning sentabr oyi oxirida Tog‘li Qorabog‘da Ozarbayjon va Armaniston davlatlari o‘rtasida qurolli nizo kelib chiqqan edi. 2020-yilning 10-noyabrida o‘t ochishni to‘xtatish to‘g‘risidagi uch tomonlama kelishuv imzolanishi bilan nizolar yakuniga yetdi.
Kelishuvga muvofiq, Tog‘li Qorabog‘ning muhim qismi Ozarbayjon harbiylari nazorati ostiga o‘tdi va tinchlik shartnomasiga rioya etilishini nazorat qilish Rossiya tinchlikparvar kuchlariga topshirildi. Qo‘shma kuzatuv markazi ishida bir necha o‘nlab turkiyalik harbiylar ham ishtirok etmoqda. Ilhom Aliyev Ozarbayjonga tajovuz qilinsa, Turkiyadan harbiy yordam so‘rashga tayyorligini ma’lum qilgan.
Izoh (0)