Toshkent viloyatida 16-fevral voqealari bo‘yicha sudlangan 5 nafar shaxs oqlandi

Toshkent viloyatida 1999-yil 16-fevral kuni sodir bo‘lgan voqealar bo‘yicha sudlangan shaxslar oqlandi, deya xabar qilmoqda viloyat sudi.

Qayd etilishicha, 24-iyul kuni jinoyat ishlari bo‘yicha Toshkent viloyati sudida 1999-yil 16-fevral voqealariga aloqadorligi yuzasidan sudlangan 5 nafar shaxsga oqlov hukmi e’lon qilindi.

Oqlangan 5 nafar fuqaroga 1999-yilda 3 yilga ozodlikdan mahrum etish jazosi belgilangan edi.

1999-yilda o‘tgan sud hukmidan norozi bo‘lgan 5 nafar shaxs oradan 22 yil o‘tib sudga appelyatsiya shikoyati bilan murojaat qilgan.

22 yil avval, 1999-yilda ularga Jinoyat kodeksining 208-moddasi, ya’ni hokimiyat harakatsizligi, ya’ni davlat organi mansabdor shaxsining o‘z xizmat vazifasi yuzasidan bajarishi lozim yoki mumkin bo‘lgan harakatlarni qasddan bajarmasligi bo‘yicha ayblov qo‘yilgan.

Shuningdek, ular 1999-yilda O‘zbekiston Prezidentining “9-may Xotira va qadrlash kuni” deb e’lon qilinishi munosabati bilan amnistiya farmonini 2-moddasi tatbiq etilib, tayinlangan jazoni o‘tashdan ozod qilingan.