Markaziy saylov komissiyasining 23-iyul, juma kuni bo‘lib o‘tgan navbatdagi yig‘ilishida Prezident saylovi sabab 2021-yilning 24–25-may kunlari O‘zbekistonga tashrif buyurgan YeXHT Demokratik institutlar va inson huquqlari bo‘yicha byurosining Ehtiyojlarni baholash missiyasi ekspertlari xulosalari to‘g‘risidagi savolga javob berildi. Bu haqda “Daryo” muxbiri xabar qilmoqda.
“Ehtiyojlarni baholash missiyasi bo‘lajak saylovlarga byuro tomonidan yuboriladigan kuzatuvchilarning hajmini, ko‘lamini va mandatini aniqlab berish uchun keladi. Shuning uchun ham missiyaning tashrifi davomida bir qator davlat va nodavlat tashkilotlari, OAV vakillari bilan uchrashuvlar tashkil etildi.
Missiyaning vazifasi hozirgi bo‘layotgan o‘zgarishlar va saylovga tayyorgarlik holatini baholash edi. Ularning hisoboti 19-iyul kuni e’lon qilindi va unda qisqacha O‘zbekistondagi saylovga tayyorgarlik holati, saylov o‘tkazishda normativ-huquqiy baza mavjudligiga ham baho berib o‘tildi.
Shuni alohida ta’kidlash kerakki, missiya hisobotida saylovga tayyorgarlik holatidan tashqari, 2019-yildan keyingi davrda saylov tizimi, saylov qonunchiligi va saylov amaliyotida amalga oshirilgan ishlarga ham baho berib o‘tilgan, ya’ni missiyaning o‘tgan saylovlarda bergan tavsiyalarining saylov qonunchiligi va saylov amaliyotiga joriy etilishi ijobiy baholangan”, — dedi Markaziy saylov komissiyasi raisi o‘rinbosari Bahrom Qo‘chqorov.
Uning ta’kidlashicha, missiya hisobotida saylovga tayyorgarlik jarayonlari ijobiy baholangan.
“Shuningdek, saylov kampaniyasida ommaviy tadbirlarni o‘tkazish, tuhmatga bo‘lgan javobgarlikni yengillashtirish, saylov kampaniyasi davrida davlat resurslaridan noqonuniy foydalanishni taqiqlash, shu jumladan, davlat mansabdor shaxslarining ham saylov kampaniyasi targ‘ibot ishlarida ishtirokini taqiqlash, saylovlarni moliyalashtirish borasidagi ochiqlikni ta’minlash, siyosiy partiyalar tomonidan oraliq va davriy hisobotlarning taqdim etilishi juda ijobiy baholangan. Bu missiya hisobotida aks etgan va hisobot hamma uchun ochiq. Hisobot byuroning rasmiy veb-saytida ham batafsil e’lon qilingan.
Missiyaning hisobotidan saylovga tayyorgarlik jarayonlari, ya’ni saylovga ishtirokchilarni tayyorlash, ularning malakasini oshirish, o‘tkazilayotgan treninglar, bundan tashqari, saylovga tayyorgarlik jarayonida normativ-huquqiy bazani takomillashtirish masalalari ham o‘rin olgan va ijobiy baho berilgan”, — dedi MSK vakili.
Izoh (0)