Ispaniyaning Bilbao shahridan jo‘natilgan “Afrosiyob” poyezdi Toshkentga yetib keldi, deya xabar bermoqda “O‘zbekiston temir yo‘llari” matbuot xizmati.
Qayd etilishicha, 2021-yil iyul oyi boshida Ispaniyaning “Patentes Talgo S.L.U.” kompaniyasi tomonidan ishlab chiqarilgan “Afrosiyob”ning yangi poyezdi Ispaniyaning Bilbao shahridan Toshkentga jo‘natilgandi.
Dastlab yangi poyezd maxsus yuk kemada 4000 kilometr masofani bosib o‘tib, Rossiyaning Sankt-Peterburg shahriga yetkazildi. U yerda harakat tarkibining barcha vagon va lokomotivlari yig‘ilib, yaxlit holatga keltirilganidan so‘ng, 20-iyul kuni temiryo‘l orqali O‘zbekistonga jo‘natildi.
Rossiya va Qozog‘iston hududlaridan yana 4200 kilometr masofani bosib o‘tib, nihoyat 24-iyul kuni kechki payt Toshkentga yetkazildi.
Eslatib o‘tamiz, ushbu rusumdagi poyezd O‘zbekistonda beshinchisi hisoblanmoqda. 2021-yil yakuniga qadar yana bitta shu turdagi yuqori tezlikda harakatlanuvchi poyezd keltiriladi. Hozirgi vaqtda O‘zbekiston rivojlangan yuqori tezlikdagi temiryo‘l infratuzilmasiga ega bo‘lgan 20 ta dunyo mamlakati ro‘yxatidan o‘rin olgan bo‘lib, dunyoning yuqori tezlikdagi poyezdlari reytingi (Global High-Speed Train Ranking)ga kiritilgan Markaziy Osiyoning yagona mamlakati hisoblanadi.
Ta’kidlanishicha, keltirilgan yangi poyezdning rasmiy taqdimot marosimi shu kunlarda, karantin cheklovlarining barcha me’yor va qoidalarini inobatga olgan holda amalga oshiriladi.
Izoh (0)