Surxondaryo viloyatining ichimlik suv ta’minoti yetib bormagan hududlaridagi aholisiga endilikda maxsus suv tashish mashinalari yordamida ichimlik suvi yetkazib beriladi. Bu haqda “O‘zsuvta’minot” AJ axborot xizmati rahbari Akmal Murodov xabar berdi.
Ma’lum qilinishicha, O‘zbekistonda aholiga ichimlik suvini yetkazib berish maqsadida Xitoydan maxsus suv tashish mashinalari olib kelingan.
“‘O‘zsuvta’minot’ AJ tomonidan Surxondaryo viloyatining ichimlik suvi yetib bormagan hududlarida istiqomat qiluvchi fuqarolarni vaqtinchalik ichimlik suvi bilan ta’minlash maqsadida 25 ta Shacman rusumli maxsus avtomashinalarning tantanali topshirish marosimi bo‘lib o‘tdi”, — deyiladi xabarda.
Marosimda “O‘zsuvta’minot” AJ boshqaruvi raisi Sohib Saifnazarov, mahalla va oilani qo‘llab-quvvatlash vaziri o‘rinbosari Botir Parpiyev va Surxondaryo viloyat hokimi To‘ra Bobolov ishtirok etgan.
Avvalroq Buxoroda 230 ming aholini toza ichimlik suvi bilan ta’minlovchi suv tozalash inshooti ta’mirlangani, Farg‘onada ichimlik suvi bilan bog‘liq muammolarni hal etish maqsadida 132 ta suv qudug‘i ishga tushirilishi to‘g‘risida xabar berilgandi.
Izoh (0)