Qashqadaryo viloyatining Yakkabog‘ tuman hokimligida hokimlikka qarashli bino yo‘qligi, hokimlik ayni kunga qadar partiya balansidagi binoda faoliyat yuritib kelayotgani ma’lum bo‘ldi. Bu haqda tuman hokimi Lutfiddin Abdullayev jurnalist va blogerlar bilan muloqotda aytib o‘tdi, deya xabar berdi “Daryo” muxbiri.
Qayd etilishicha, 2021-yilning 18-iyul kuni Yakkabog‘ tuman hokimligi viloyatda faoliyat yurituvchi jurnalist va blogerlar uchun press-tur tashkil etib, OAV vakillarini qiziqtirgan savollarga javob bergan.
Press-tur davomida tashkil etilgan matbuot anjumanida tuman hokimi Lutfiddin Abdullayev so‘z olib, tuman hokimligi binosi hokimlikka qarashli emasligini, hokimlik partiya balansidagi binoda faoliyat yuritib kelayotganini aytgan.
“Bundan bosh vazir o‘rinbosarlarining, moliya vazirining ham xabari bor. Iqtisodiyot va moliya bo‘yicha shug‘ullanuvchi Jamshid Qo‘chqorov hokimlik binosi uchun mablag‘ ajratilishini, tez orada bino qurilishini aytgan. Bu muammo yaqinda hal bo‘ladi”, — dedi tuman hokimi Lutfiddin Abdullayev.
Tuman hokimining ma’lumot berishicha, hokimlik faoliyat yurituvchi bino Xalq demokratik partiyasining tuman bo‘limi balansida turadi.
“Daryo” muxbirining qo‘shimcha qilishicha, tuman hokimi jurnalist va blogerlar bilan muloqot avvalida tumanda amalga oshirilgan ishlar haqida ma’lumot berib, qilingan ishlarni shaxsan o‘zi ko‘rsatgan.
Izoh (0)