Oliy Majlis Qonunchilik palatasining 17-iyul kungi majlisida aholini koronavirusga qarshi emlash bo‘yicha amalga oshirilayotgan ishlar sust borayotgani, SSV va soha mutaxassislari tomonidan emlashning ijobiy samarasi haqida aholining keng qatlamlari orasida targ‘ibot-tashviqot ishlarini olib borish qoniqarsiz ahvolda ekanligi qayd etilib, emlash punktlarida yetarli darajada shart-sharoitlar yaratilmagani deputatlar tomonidan tanqid qilindi.
Qonunchilik palatasi spikeri Nurdinjon Ismoilovning ma’lum qilishicha, majlisda Respublika maxsus komissiyasiga keng jamoatchilik bilan bevosita muloqotga kirishadigan aholi qatlamini emlash ishlarini mumkin qadar tezlashtirish va jadallashtirish bo‘yicha tavsiyalar ham berildi.
Xususan, karantin choralarini, shu jumladan, o‘z xodimlarining emlanishini yetarlicha ta’minlagan (jamoaviy immunitetga erishgan), tashrif buyuruvchi mijozlarga nisbatan yetarli talablar o‘rnatilgan holda xizmat ko‘rsatish, umumiy ovqatlanish korxonalariga taalluqli karantin cheklovlarini yengillashtirish, ya’ni cheklangan muddatdan (soat 20:00 gacha) tashqari vaqtlarda ishlashga ruxsat berish amaliyotini joriy qilish taklif qilingan.
Bundan tashqari, o‘z vaqtida va ixtiyoriy ravishda emlangan xodimlarni ish beruvchilar tomonidan rag‘batlantirish, emlanishni asossiz ravishda rad etgan xodimlarga nisbatan esa mehnat to‘g‘risidagi qonunchilikda nazarda tutilgan choralarni qo‘llash amaliyotini keng joriy etishni targ‘ib qilish, emlanganlarga nisbatan imtiyoz olish imkoniyatlarini berish (ish beruvchi tomonidan mehnat faoliyatiga “otgul” berish, ularni moddiy rag‘batlantirish va boshqalar), asossiz ravishda emlanmagan 18 yoshdan yuqori fuqarolarga ayrim cheklovlar o‘rnatishni (sport o‘yingohlari, konsert, kino va boshqa ommaviy tadbirlarga qo‘ymaslik) joriy etish masalasini ko‘rib chiqish tavsiya etilgan.
Eslatib o‘tamiz, Respublika maxsus komissiyasining qarori bilan 2021-yilning 28-iyunidan respublika bo‘yicha ko‘ngilochar obyektlar — restoran, tungi klublar, diskoteka, karaoke, bilyard zallari va kompyuter o‘yinlari markazlari hamda umumiy ovqatlanish obyektlari — kafe, oshxona va choyxonalarning ishlashiga soat 08:00 dan 20:00 gacha ruxsat berilgan edi.
Ushbu cheklovlarga qo‘shimcha kiritildi va 20-iyuldan boshlab umumiy ovqatlanish obyektlari — restoran, kafe, oshxona va choyxonalarni soat 08:00 dan 20:00 gacha faqatgina ochiq havoda ishlashiga ruxsat berilishi belgilandi.
Respublika maxsus komissiyasining qarori bilan, shuningdek, 2021-yil 1-sentabrgacha 18 yoshdan oshgan 14 ta toifadagi fuqarolar koronavirusga qarshi emlanishi shart etib belgilandi. Ular qatorida umumiy ovqatlanish korxonalari, xususan, jamoat joylarida joylashgan tezkor ovqatlanish shoxobchalari, choyxonalar, to‘yxonalar, kafelar va restoranlar xodimlari ham bor.
Izoh (0)