Qashqadaryoda ruhiy kasal o‘g‘il 74 yoshli onasini bolta bilan o‘ldirdi

Qashqadaryo viloyati Koson tumanida yashovchi E.Sh. o‘z onasining qotiliga aylandi, deb xabar bermoqda NasafNews.

Ma’lum qilinishicha, 1975-yilda tug‘ilgan erkak E.Sh. 10-iyul kuni 1947-yilda tug‘ilgan keksa onasi M.B.ni bolta bilan urib, unga og‘ir tan jarohati yetkazgan. Oqibatda ona olgan tan jarohatlaridan vafot etgan.

Qashqadaryo viloyat IIB ma’lumotlariga ko‘ra, erkak 2003-yildan buyon shizofreniya kasalligi bilan hisobda turgan. Marhuma M.B. farzandi E.Sh.ni bir necha bor davolatgan, jumladan, 2021-yil 6-iyun kuni uni viloyat Asab-ruhiy kasalliklar dispanserida davolatib, uyiga olib kelgan.

Ammo uning xatti-harakatlari biriktirilgan oilaviy poliklinika patronaj guruhi mas’ullari tomonidan doimiy nazorat tartibida o‘rganilmagan.

Holat yuzasidan Koson tuman prokuraturasi tomonidan E.Sh.ga nisbatan Jinoyat kodeksining 97-moddasi 1-qismi tegishli bandlari bilan jinoyat ishi qo‘zg‘atilib, dastlabki tergov harakatlari olib borilmoqda.