Toshkent va Surxondaryo viloyatlarida yer sotish bilan bog‘liq firibgarlik holatlari aniqlandi, deb xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Departamentning Zangiota tuman bo‘limi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda fuqarolar R.Q. va B.R. fuqaro I.ning ishonchiga kirib, unga vakolatli tanishlari orqali Qibray tumani hududida joylashgan 7 gektar yer maydonini tender savdolariga qo‘yish orqali sotib olib berishni va’da qilib, evaziga 23 500 dollarni firibgarlik yo‘li bilan qo‘lga kiritgani aniqlangan.
Departament hamda DXXning Angor tumani bo‘limlari tomonidan o‘tkazilgan tezkor tadbirda esa “P” fermer xo‘jaligi rahbari H.H. fuqaro A.ga Bandixon tumanidagi davlat zaxirasida bo‘lgan 2 gektar yer maydonini o‘ziniki ekanligini aytib, ushbu yer maydonini firibgarlik yo‘li bilan sotishni rejalashtirib, oldindan kelishilgan 100 million so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Toshkent viloyati “Bochka” dam olish maskani hududidan 80 sotix yerni fuqaroga 450 ming dollarga sotmoqchi bo‘lgan shaxs, Bo‘stonliqda ot sportiga ajratilgan 25,4 gektar yerni 1,5 million dollarga sotmoqchi bo‘lgan shaxs, Toshkent viloyatining Yangiyo‘l tumanida esa 9 ming dollar evaziga fermer xo‘jaligining 6 sotix yerini olib berishni va’da qilgan shaxs qo‘lga olingandi.
Izoh (0)