Қашқадарё вилоятининг Яккабоғ туман ҳокимлигида ҳокимликка қарашли бино йўқлиги, ҳокимлик айни кунга қадар партия балансидаги бинода фаолият юритиб келаётгани маълум бўлди. Бу ҳақда туман ҳокими Лутфиддин Абдуллаев журналист ва блогерлар билан мулоқотда айтиб ўтди, дея хабар берди «Дарё» мухбири.
Қайд этилишича, 2021 йилнинг 18 июль куни Яккабоғ туман ҳокимлиги вилоятда фаолият юритувчи журналист ва блогерлар учун пресс-тур ташкил этиб, ОАВ вакилларини қизиқтирган саволларга жавоб берган.
Пресс-тур давомида ташкил этилган матбуот анжуманида туман ҳокими Лутфиддин Абдуллаев сўз олиб, туман ҳокимлиги биноси ҳокимликка қарашли эмаслигини, ҳокимлик партия балансидаги бинода фаолият юритиб келаётганини айтган.
«Бундан бош вазир ўринбосарларининг, молия вазирининг ҳам хабари бор. Иқтисодиёт ва молия бўйича шуғулланувчи Жамшид Қўчқоров ҳокимлик биноси учун маблағ ажратилишини, тез орада бино қурилишини айтган. Бу муаммо яқинда ҳал бўлади», — деди туман ҳокими Лутфиддин Абдуллаев.
Туман ҳокимининг маълумот беришича, ҳокимлик фаолият юритувчи бино Халқ демократик партиясининг туман бўлими балансида туради.
«Дарё» мухбирининг қўшимча қилишича, туман ҳокими журналист ва блогерлар билан мулоқот аввалида туманда амалга оширилган ишлар ҳақида маълумот бериб, қилинган ишларни шахсан ўзи кўрсатган.
Изоҳ (0)