Afg‘onistondan kamida 115 kishining Kanadaga evakuatsiya qilinishi kutilmoqda. Bu haqda The Canadian Press’ga tayanib, “TASS” xabar berdi.
Canadian Press ushbu raqamlarni Afg‘onistondagi Kanada kontingentining uch nafar sobiq komandiriga tayanib e’lon qildi. Kanada harbiylari Afg‘onistonda 2001-yildan 2014-yilgacha bo‘lgan. 2009-yildan 2012-yilgacha ham Kanada hukumati ushbu harbiylarga yordam bergan 800 dan ortiq afg‘onistonlikni qabul qilgandi.
15-iyul kuni Shimoliy Amerika mamlakatining immigratsiya, qochqinlar va fuqarolik masalalari bo‘yicha vaziri Marko Mendichino Kanada ma’murlari tez orada Afg‘onistondagi Kanada kontingentiga yordam bergan afg‘on tarjimonlari va ularning oila a’zolarini evakuatsiya qilish jarayonini boshlashini e’lon qildi. U operatsiyaning boshlanish vaqti hamda Ottava afg‘onistonliklarning qanchasiga boshpana berishiga aniqlik kiritmadi.
AQSh prezidenti Jo Bayden Amerika hukumati iyul oxirida AQSh kuchlarini qo‘llab-quvvatlagan afg‘onistonlik fuqarolarni aviareyslar yordamida evakuatsiya qilishni boshlashi haqida e’lon qilgandi. Amerika yetakchisining ta’kidlashicha, rasmiylar AQShdan maxsus immigratsion viza olish uchun murojaat qilib, o‘z mamlakatidan chiqib ketishga qaror qilgan afg‘onlarni va ularning oilalarini ko‘chirish maqsadida iyul oyida havo parvozlarini boshlaydi.
Pentagon vakili Jon Kirbi afg‘onistonliklar aynan qayerga ko‘chirilishini aytmagan, shuningdek, ularning Afg‘oniston hududi bo‘ylab harakatlanishi to‘g‘risida boshqa hech qanday ma’lumot bermagan. Uning so‘zlariga ko‘ra, Vashington ushbu fuqarolarning barchasi Afg‘oniston hududidan xavfsiz ravishda chiqib ketishini istaydi.
AQSh ommaviy axborot vositalarining xabarlariga ko‘ra, Amerika qo‘shinlariga yordam bergan, shu jumladan, tarjimonlik qilgan 18 mingga yaqin afg‘onistonlik va yana ularning 53 ming oila a’zolari AQShdan immigratsion viza olishga umid qilmoqda. Biroq bu juda uzoq jarayon, shuning uchun ularni evakuatsiya qilishga qaror qilingan.
Avvalroq Bloomberg AQSh prezidenti Jo Bayden ma’muriyati Qozog‘iston, Tojikiston va O‘zbekistondan o‘z hududlariga AQSh Qurolli kuchlari bilan ishlagan 9 mingga yaqin afg‘onlarni vaqtincha joylashtirishni so‘ragani haqida xabar bergan edi. Ayni paytda Qozog‘iston AQShdan afg‘onistonlik qochqinlarni qabul qilish bo‘yicha murojaat kelib tushmaganini bildirdi.
Izoh (0)