Yevrokomissiya 14-iyul kuni iqlim o‘zgarishiga qarshi kurash rejasining konsepsiyasini e’lon qildi. Unda 2030-yilga kelib Yevropada zararli issiqxona gazlarini 1990-yilga nisbatan 55 foizgacha kamaytirish nazarda tutilgan (hozir Yevropada ularning miqdori 76 foizni tashkil qiladi).
Rejaning asosiy bandlari:
- Import qilinadigan tovarlarga ularning uglerod ko‘rsatkichiga qarab bojxona bojini joriy etish. Birinchi bosqichda bu elektr energiyasi, o‘g‘itlar, po‘lat, alyuminiy, sementga tegishli bo‘ladi.
- Keyingi 15 yil ichida yangi avtomobillar uchun emissiya (zararli gaz ajratish) standartlarini bosqichma-bosqich qat’iylashtirish. 2035-yildan boshlab ularning uglerod ajratishi nolga teng bo‘lishi kerak — bu Yevropa Ittifoqida ichki yonish dvigatellari benzin va dizel yoqilg‘isida ishlaydigan avtomobillarni sotish taqiqlanishini anglatadi.
- Elektr va vodorod yoqilg‘isida harakatlanadigan transport vositalarini zaryadlovchi stansiyalar tarmog‘ini sezilarli darajada kengaytirish.
- Aviatsiya va dengiz orqali yuk tashish oqibatida atrof-muhitning ifloslanishiga soliq solish.
- Iqtisodiyotning yangi tarmoqlarini kiritish orqali karbonat angidrid zararli gazlari savdosi tizimini kengaytirish.
Reja kuchga kirishi uchun uni Yevropa parlamenti va Yevropa Ittifoqiga a’zo davlatlarning barchasi tasdiqlashi kerak. Rejani ishlab chiquvchilar uni yakuniy qabul qilish uchun, taxminan, ikki yil kerak bo‘ladi deb umid qilmoqda.
Tahlilchilarning fikriga ko‘ra, reja Yevropa Ittifoqidagi daromadi nisbatan kam mamlakatlarning qarshiligiga sabab bo‘lishi mumkin, chunki ekologik toza yoqilg‘iga o‘tish mahsulot va xizmatlarning narxini oshiradi.
Bundan tashqari, Yevropada deyarli butunlay ko‘mir bilan ishlaydigan elektr stansiyalari tomonidan ishlab chiqarilgan elektr energiyasiga tobe yirik mintaqalar mavjud va ular iqtisodiyotni deyarli to‘liq isloh qilish uchun qo‘shimcha moliyaviy kafolatlarni talab qiladi. Ushbu kafolatlar uchun dastlabki reja doirasida Yevropa Ittifoqi budjetidan 72 milliard yevro taqdim etiladi.
O‘z navbatida, tabiatni muhofaza qilish tashkilotlarining ayrim vakillari rejada taklif qilingan choralar yetarli emas deb hisoblamoqda. Ularning fikricha, ushbu choralar global isishni to‘xtatmaydi.
Izoh (0)