Vyetnamda so‘nggi haftalarda koronavirusga chalinish holatlari bo‘yicha eksponensial o‘sish kuzatilmoqda. Vyetnam pandemiya boshidan to yaqin vaqtgacha kasallik tarqalishiga yo‘l qo‘ymaslik bo‘yicha eng yaxshi natijalarga erishayotgan mamlakatlardan biri edi, deb yozadi Meduza.
Vyetnam koronavirus birinchi bo‘lib tarqalgan Xitoy bilan chegaradosh, shuning uchun mamlakatda kasallikka chalinish bo‘yicha dastlabki holatlar 2020-yil 23-yanvarda — Yevropaga qaraganda ancha oldin paydo bo‘lgan.
Fevral oyida, butun dunyoda kasallanish holatlari hali sanoqli darajada bo‘lgan paytda, Vyetnam hukumati Xitoydan keluvchilarning mamlakatga kirishini chekladi, pandemiya boshlanganda esa chegaralarni butunlay yopib qo‘ydi. Aksariyat mamlakatlar singari Vyetnam hukumati ham ommaviy testlarga emas, balki kasallanganlar va chet eldan kirib kelganlar bilan muloqotda bo‘lgan odamlarni qidirib topish hamda virus yuqtirish xavfi bo‘lgan odamlar uchun karantin belgilash choralariga tayangan.
2020-yil aprel oyida mamlakatda 85 mingdan ortiq odam karantin holatida bo‘lgan, vaholanki, o‘sha paytda infeksiya hali sanoqli odamlarda tasdiqlangan edi. Virus alomatlari bor kishilar bilan bir qatorda ular bilan aloqada bo‘lganlarning hammasi karantin ostiga olingan.
Bundan tashqari, rasmiylar gigiyena tadbirlarini targ‘ib qilish, niqob taqish va ijtimoiy masofa saqlash rejimiga e’tibor qaratdi.
O‘z vaqtida qabul qilingan mazkur chora-tadbirlar Vyetnamga butun mamlakat bo‘ylab karantin joriy qilish va virusning nazoratsiz tarqalishidan yiroq bo‘lish imkonini berdi. Hukumat faqat bir nechta mahalliy lokdaunlar bilan cheklandi.
Natijada 2021 yil martiga kelib — pandemiya boshlanganidan bir yil o‘tgach, 100 million aholi yashaydigan mamlakatda kasallanishning bor-yo‘g‘i ikkita kichik mahalliy o‘chog‘i kuzatilgan, ularda kuniga bir necha o‘nlab kishilarda infeksiya qayd etilgan: qolgan vaqtlarda kasallanish holatlari sanoqli bo‘lgan.
Vyetnamda pandemiyaning birinchi yilida jami 2,5 mingga yaqin odam COVID-19 yuqtirib oldi, bir necha o‘nlab bemorlar vafot etdi.
Mamlakatda kasallikning keskin o‘sishi 2021-yil may oyining birinchi yarmida boshlandi, bir kunda o‘nlab, keyinroq yuzlab odamlarda infeksiya qayd etila boshladi. May oyi oxirida rasmiylarning ma’lum qilishicha, koronavirusning mamlakatda tarqalayotgan varianti delta va alfa shtammlarga o‘xshaydi —shu sababli kasallikning yuqish tezligi ortmoqda.
Iyun oyi oxiridan virus aholi zich joylashgan Xanoy va Xoshimin shaharlarida yoyila boshlagach, kasallanish darajasi eksponensial tarzda o‘sa boshladi, infeksiya yuqtirish holati har olti-yetti kunda ikki baravar ko‘payishni boshladi: 22-iyun kuni 252 ta holat, 30-iyunda – 545 ta, 6-iyulda – 1029 ta, 12-iyulda – 2187 ta. 14-iyul kuni esa 2830 kishida kasallik qayd etilib, rekord o‘rnatildi.
Mamlakatda virusga qarshi kurashish uchun aholini ommaviy testlardan o‘tkazish boshlandi. Vyetnamning aholi zich joylashgan eng yirik shahri Xoshiminda virus tez tarqalmoqda. Hozir shaharda faqat ruxsatnoma asosida harakatlanish mumkin, kafe va restoranlar yopiq, ulardan ovqat yetkazib berish ham taqiqlangan. Boshqa ko‘plab shaharlarda, jumladan, Xanoyda ham turli xil darajadagi hududiy lokdaunlar o‘rnatilgan.
Virus tarqalishi bilan bog‘liq vaziyat Vyetnamda emlanganlar sonining juda kamligi bilan murakkablashmoqda — aholining 4 foizdan kamrog‘i koronavirusga qarshi vaksinaning birinchi komponentini olgan, 1 foizdan kam odam to‘liq emlangan. Vaksinaning dastlabki partiyasi (Vyetnamda, asosan AstraZeneca qo‘llaniladi) mamlakatga mart oyida yetkazib berildi, ammo ommaviy vaksinatsiya kasallik o‘sishi bilan iyun oyining o‘rtalariga kelib boshlandi. Hozir Vyetnamda kuniga bir necha yuz ming kishi emlanmoqda.
Izoh (0)