Qirg‘iziston Investitsiya vazirligi matbuot xizmati Turkiyaning Sky Ray Ve Оto Yedek Parça Ekipmanlari Üretim Sanayi A.Ş kompaniyasi Bishkekda monorels (bir izli yerusti metrosi) transport tizimini qurish masalasini o‘rganayotgani haqida xabar berdi. Kompaniya bilan hamkorlik to‘g‘risida memorandum imzolangan, deb yozadi Kloop.
Vazirlikning ma’lum qilishicha, Investitsiyalar vazirligi va Sky Ray Ve Oto Yedek Parça Ekipmanlari Üretim Sanayi A.Ş o‘rtasidagi shartnomani Qirg‘iziston prezidenti Sadir Japarov Turkiyaga rasmiy tashrifi chog‘ida imzolagan.
Ushbu memorandumni amalga oshirish doirasida 12—14-iyul kunlari Turkiya kompaniyasining boshqaruv raisi Nejmeddin Genchyilmaz va kompaniya texnolog-muhandisi Yilay Yilmaz Bishkekka tashrif buyurdi. Ular shahar transport tizimini va monorels yo‘lni ishga tushirish imkoniyatlarini o‘rgandi.
Shundan so‘ng davlat organlari va munitsipalitetlarning Nejmeddin Genchyilmaz bilan ishchi uchrashuvida loyiha batafsil muhokama qilindi. Yig‘ilishda investitsiyalar vaziri Almambet Shikmamatov Qirg‘iziston “turk investorlari uchun har doim ochiq” ekanini ta’kidlab, “loyihaning tezroq amalga oshirilishida har tomonlama yordam berishga” va’da berdi.
“Vazirlik davlat idoralari bilan birgalikda ushbu loyihani amalga oshirish ustida astoydil harakat qiladi”, — deyiladi bayonotda.
Bishkekda monorels transport tizimini qurish rejalari 2020-yil oxirida muhokama qilingandi.
Poytaxtning o‘sha paytdagi vitse-meri Aziz Alimqulov 21-dekabr kuni “Bishkek monorels transport tizimi” loyihasini taqdim etgan. Uning so‘zlariga ko‘ra, bunday tizimning afzalliklari — tashish imkoniyati, ekologik tozalik, qulaylik, integratsiya, ko‘chalardagi tirbandlikni kamaytirish va xavfsiz harakatlanishdan iborat.
Alimqulovning ma’lum qilishicha, rejalashtirilgan monorelsning umumiy uzunligi 37 kilometrni tashkil etadi, loyihaga 32 ta stansiya va ikkita liniya qurilishi kiradi. Uning so‘zlariga ko‘ra, vagonning yo‘lovchi sig‘imi 150 dan 180 kishigacha bo‘ladi, monorelsning balandligi esa 5-7 metrni tashkil qiladi. Loyihani davlat-xususiy sherikligi doirasida amalga oshirish rejalashtirilgan edi.
Biroq shahar aholisi monorels yo‘l qurish rejalariga shubha bilan qaragan va poytaxtda bunday yo‘l qurish mumkin emasligini ta’kidlagan. Skeptiklar o‘sha paytda Bishkek meri vazifasini bajaruvchisi Balbak Tulobayev tomonidan tanqid qilingan.
Tulobayev monorels kelajak loyihasi ekanini aytib, uni amalga oshirish zarurligini, qolaversa, Bishkekda monorels temir yo‘l qurish boshqa mamlakatlarga qaraganda arzonroq bo‘lishini ta’kidlagan.
Ma’lumot uchun monorels — relsli transportning bir turi. Monorels deganda rasman oddiysidan farqli o‘laroq ikkita emas, bitta relsli temiryo‘l tushunilsa-da, amalda hech qanday relsi bo‘lmagan yo‘ldan tashqaridagi transportning turli shakllari nazarda tutiladi. Odatda yer ustida noan’anaviy usulda, ya’ni ikkita tayanch relssiz harakatlanadigan estakada transportinining har qanday shakli monorels deyiladi.
Izoh (0)