ОАВ: Афғонистондан 115 киши Канадага эвакуация қилиниши мумкин

Афғонистондан камида 115 кишининг Канадага эвакуация қилиниши кутилмоқда. Бу ҳақда The Canadian Press’га таяниб, «ТАСС» хабар берди.

Canadian Press ушбу рақамларни Афғонистондаги Канада контингентининг уч нафар собиқ командирига таяниб эълон қилди. Канада ҳарбийлари Афғонистонда 2001 йилдан 2014 йилгача бўлган. 2009 йилдан 2012 йилгача ҳам Канада ҳукумати ушбу ҳарбийларга ёрдам берган 800 дан ортиқ афғонистонликни қабул қилганди.

15 июль куни Шимолий Америка мамлакатининг иммиграция, қочқинлар ва фуқаролик масалалари бўйича вазири Марко Мендичино Канада маъмурлари тез орада Афғонистондаги Канада контингентига ёрдам берган афғон таржимонлари ва уларнинг оила аъзоларини эвакуация қилиш жараёнини бошлашини эълон қилди. У операциянинг бошланиш вақти ҳамда Оттава афғонистонликларнинг қанчасига бошпана беришига аниқлик киритмади.

АҚШ президенти Жо Байден Америка ҳукумати июль охирида АҚШ кучларини қўллаб-қувватлаган афғонистонлик фуқароларни авиарейслар ёрдамида эвакуация қилишни бошлаши ҳақида эълон қилганди. Америка етакчисининг таъкидлашича, расмийлар АҚШдан махсус иммиграцион виза олиш учун мурожаат қилиб, ўз мамлакатидан чиқиб кетишга қарор қилган афғонларни ва уларнинг оилаларини кўчириш мақсадида июль ойида ҳаво парвозларини бошлайди.

Пентагон вакили Жон Кирби афғонистонликлар айнан қаерга кўчирилишини айтмаган, шунингдек, уларнинг Афғонистон ҳудуди бўйлаб ҳаракатланиши тўғрисида бошқа ҳеч қандай маълумот бермаган. Унинг сўзларига кўра, Вашингтон ушбу фуқароларнинг барчаси Афғонистон ҳудудидан хавфсиз равишда чиқиб кетишини истайди.

АҚШ оммавий ахборот воситаларининг хабарларига кўра, Америка қўшинларига ёрдам берган, шу жумладан, таржимонлик қилган 18 мингга яқин афғонистонлик ва яна уларнинг 53 минг оила аъзолари АҚШдан иммиграцион виза олишга умид қилмоқда. Бироқ бу жуда узоқ жараён, шунинг учун уларни эвакуация қилишга қарор қилинган.

Аввалроқ Bloomberg АҚШ президенти Жо Байден маъмурияти Қозоғистон, Тожикистон ва Ўзбекистондан ўз ҳудудларига АҚШ Қуролли кучлари билан ишлаган 9 мингга яқин афғонларни вақтинча жойлаштиришни сўрагани ҳақида хабар берган эди. Айни пайтда Қозоғистон АҚШдан афғонистонлик қочқинларни қабул қилиш бўйича мурожаат келиб тушмаганини билдирди.