Ukrainada barcha fuqarolarga ukrain tilini bilish majburiy etib belgilandi

Ukraina Konstitutsiyaviy sudi (KS) ukrain tilini davlat tili sifatida ta’minlash to‘g‘risidagi qonunga muvofiq barcha fuqarolarga ukrain tilini bilishni majburiy etib qo‘ydi. Ushbu qaror KS rasmiy veb-saytida e’lon qilingan.

Hujjat matnida qayd etilishicha, ushbu choralar Ukrainaning boshqa davlatlar, jumladan, Rossiya imperiyasi va SSSR tarkibida uzoq vaqt bo‘lgan turli qismlarini o‘sha davlatlar ta’siridan xalos qilish uchun zarur. “Ukrain tili — qadimiy Kiyev davridan beri o‘zining tarixiy davomiyligini saqlab kelayotgan Ukraina davlatchiligining ajralmas atributidir ”, — deyiladi KS bayonotida.

Qayd etilishicha, fuqarolar shaxsiy muloqot uchun har qanday boshqa tildan foydalanish huquqiga ega bo‘lib qoladi. Sud yangi normaning mazmunida hech qanday diskriminatsiya topmadi.

Xabarda aytilishicha, “ukrain tili — bu Ukraina davlatchiligi va birdamligining ajralmas sharti (conditio sine qua non)”. Ukraina Konstitutsiyaviy sudining qarori  majburiy va yakuniy bo‘lib, shikoyatga o‘rin yo‘q. Qonunni ishlab chiqish, qabul qilish va amalga oshirishda sudyalar hech qanday qonunbuzarliklarni aniqlamadi.

Ukrainada mamlakatning beshinchi prezidenti Pyotr Poroshenko hukumati tomonidan ishlab chiqilgan “Ukrain tilining davlat tili sifatida ishlashini ta’minlash to‘g‘risida”gi qonun 2019-yil 16-iyulda kuchga kirgandi. Hujjatga ko‘ra, ukrain tili davlat va mahalliy hokimiyat organlari, ta’lim muassasalari, kasalxonalar, xizmatlar va ommaviy axborot vositalari uchun majburiy bo‘lib qoldi.

Amaldagi prezident Vladimir Zelenskiy saylovoldi tashviqoti paytida ushbu qonunning ayrim bandlarini tanqid qilgan, keyinchalik “Xalq xizmatkori” deputatlari ham ularni tanqid qilgan. “Muxolifat platformasi — hayot uchun” partiyasining vakillari Konstitutsiyaviy sud yordamida qonunga qarshi chiqishga urindi, ammo 14-iyul kuni sud hujjatning barcha bandlarini asosiy qonunga muvofiq deb tan oldi.